Aksionet e kompanisë Apple u rritën pasi tejkaluan pritjet më të ulëta të analistëve për të ardhurat tremujore.
Drejtuesit sakaq parashikuan një perspektivë pozitive për vitin, pavarësisht një fillimi të vështirë të vitit 2024.
Kompania raportoi të ardhura prej 90.75 miliardë dollarësh në tre muajt e parë të 2024-ës, 4 për qind më pak se një vit më parë.
Shitjet e iPhone-it të saj kryesor u ulën 10 për qind nga një vit më parë në 46 miliardë dollarë, krahasuar me 51.3 miliardë dollarë vitin e kaluar.
Dhe shitjet në Kinë – një rajon në të cilin investitorët janë fokusuar veçanërisht – ranë në 16.3 miliardë dollarë për tremujorin, kundrejt 17.8 miliardë dollarë një vit më parë.
Por investitorët kishin frikë se ky tremujor mund të kishte qenë më i keq dhe aksionet e Apple u rritën 6 për qind pas publikimit të fitimeve.
Kompania njoftoi gjithashtu 110 miliardë dollarë të tjera blerje të aksioneve dhe rriti dividentin e saj tremujor me 4 për qind.
Paçka disa shqetësimeve në lidhje me biznesin e saj kryesor, Apple parashikoi prezantime të mëdha produktesh që mund të kompensojnë një fillim të turbullt të vitit 2024.
Po ashtu po projekton rritje të ulët njëshifrore për biznesin e saj të harduerit, me rritje të vazhdueshme të fuqishme në shërbime.
Gjatë tremujorit të kaluar, të ardhurat nga shërbimet – që përfshin App Store, Apple TV dhe Apple Pay – u rritën me 14 për qind në 23.9 miliardë dollarë rekord.
Analistët shpresojnë se Apple mund të rrisë shitjet e telefonave inteligjentë dhe laptopëve të saj duke zbuluar veçori të reja të shumëpritura, potencialisht në konferencën e zhvilluesve të saj në qershor.
Ka nxjerrë kufjet Vision Pro në shkurt dhe pritet të zbulojë një model të ri iPad në një ngjarje në maj.
Apple ndërkaq ka humbur edhe një herë pozicionin e saj si kompania më e vlefshme e listuar në botë.
Që nga janari, Apple ka parë anulimin e projektit të saj shumëvjeçar të makinave, rritje të presionit nga zbatuesit e antitrustit në SHBA dhe BE dhe rënie të shitjeve të iPhone në Kinë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
