Për përmirësimin e gjendjes së viktimave të krimit të luftës në Kosovë, Qeveria ka miratuar Projektligjin për kompensimin e tyre.
Kryeministri i Kosovës, Albin Kurti, deklaroi se miratimi i kësaj pike nga ministrat do të krijoj kushte më të mira për viktimat e krimit të luftës.
“Shqyrtimi i projektligjit për kompensimin e viktimave të krimit ka për qëllim përmirësimin dhe efikasitetin e programit për viktimat e krimit dhe procedurave që lidhen me të”, ka thënë Kurti.
Ndërkaq, ishte zëvendësministri i Drejtësisë, Blerim Sallahu ai që e prezantoi këtë projektligj dhe bëri thirrje para kabinetit qeveritar për miratimin e tij.
Ndryshe, më 10 dhjetor, organizata jo qeveritare “Ngritja e Zërit” i është drejtohuar Gjykatës Kushtetuese në Kosovë, për të njëjtin qëllim.
Kjo organizatë deponoi në këtë gjykatë dosje të cilat kanë të bëjnë me kompensimin e dëmeve të luftës.
Shkak i përsëritjes së kësaj procedure për të dhjetën herë, thuhet se është refuzimi i vazhdueshëm i padive për kompensim të dëmeve të luftës.
Kryetari i organizatës “Ngritja e Zërit”, Jahir Bejta është shprehur se për të gjitha këto herë kanë dorëzuar tri dosje.
Ndryshe, deri më tani, Qeveria e Kosovës asnjëherë nuk ka paraqitur ndonjë vlerësim zyrtar të dëmeve materiale nga lufta.
Megjithatë në vitin 2011, 12 vjet pas përfundimit të luftës, është paralajmëruar se do ta nisë mbledhjen e fakteve për të argumentuar këto dëme.
Për këtë arsyeje ishte krijuar Instituti për Hulumtimin e Krimeve të Luftës, në kuadër të Ministrisë së Drejtësisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
