Projektligji për portin e Durrësit kalon me procedurë të përshpejtuar në Kuvend

Kryeministri i Shqipërisë, Edi Rama, deklaroi se në vendin tonë po bëhet një investim që nuk është bërë ndonjëherë.

Ky projekt, sipas tij, e transformon Durrësin në një nga pikat më rëndësishme në Mesdhe.

Kreu i qeverisë theksoi se në Kuvend “as u miratua dhe as u diskutua gjë”.

Përfaqësuesi demokrat Enkelejd Alibeaj u shpreh sakaq se ky projektligj ka pesë nene bashkë me hyrjen në fuqi dhe kushton më shumë nga 30 vite.

“Kostoja e këtij projektligji është mbi 2 miliardë dhe ju doni ta kaloni me procedurë të përshpejtuar sot kur diskutohet buxheti”, shtoi Alibeaj.

Ai parashtroi disa pyetja nga ana e tij lidhur me këtë projekt: “Çfarë është dhënë dhe çfarë është marrë? Sa është territori i Shqipërisë që ju po shisni? Sa fiton shteti shqiptar? Çfarë pazari është bërë me Portin e Durrësit?”.

Në përmbyllje ai i bëri thirrje presidentit të Republikës (Bajram Begaj) dhe organeve të drejtësisë, nëse ky projektligj është i mirë për shqiptarët dhe a do të sjellë mirëqenie.

Projekti

Porti i Durrësit është projektuar dhe do të ndërtohet edhe si “Porti i Prishtinës”.

Lajmin e bëri të ditur studio holandeze gjatë muajit majt për ndërtimin e portit të ri në Porto Romano.

“Pra, ju keni shtuar Prishtinën, shkëlqyer, praktikisht ky bëhet edhe porti i saj gjithashtu”, u shpreh kryeministri shqiptar Edi Rama para përfaqësuesit holandez.

Sipas studios, porti më vete është vetëm port, por duhet konsideruar si një element i një zinxhiri të tërë logjistik.

Në vijim, përfaqësuesi deklaroi se kjo mund të jetë një portë hyrëse për në Ballkanin Perëndimor.

Rama shtoi se ky ishte qëllimi që në premisat e para të këtij projekti.

“E pamë që porti aktual ishte një rrëmujë e tërë, ndoste dhe nuk kishte kapacitetet për t’u zgjeruar”, shtoi kreu i qeverisë shqiptare.

Sa i takon portit të ri, kryeministri theksoi se ai ka potencial, ka kapacitete dhe na bën portën hyrëse në të gjithë Ballkanin Perëndimor.

“Zgjatimi i portit të thatë në Prishtinë është kryevepër”, tha në përmbyllje Rama.

Kujtojmë që më 7 prill kreu i qeverisë bënte me dije fillimisht se porti aktual nuk mund të vazhdojë të rrijë në zemër të qytetit.

Kjo, pasi nuk ka sens që qyteti të marrë gjithë ndotjen e portit aktual.

I ftuar në një studio televizive, Rama nënvizonte se porti komercial tregtar do të shkojë në Porto Romano.