Opozita është grumbulluar sërish këtë të martë të 28 majit para Bashkisë së Tiranës, ku kërkojnë dorëheqjen e kryebashkiakut, Erion Veliaj, në lidhje me aferën “5D”.
“Erion në burg”, “Hajdut” “Shko të shokët”, ishin disa nga pankartat e mbajtura në duar.
Edhe këtë herë nuk munguan hedhjet e molotovit drejt policisë, por edhe në hapësirën ku po zhvillohej protesta.
Ndërkohë, policia ka publikuar më herët edhe planin e masave të marra në kuadër të protestës.
Në zbatim të planit të masave, Policia e Shtetit njoftoi se, prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.
Në njoftim thuhet gjithashtu se gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime.
Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore.
Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
