“Seanca e grushteve” – deputetët dhe zëvendëskryeministri pajtohen që çështjen ta zgjidhin me ndërmjetësim

Në seancën gjyqësore që është mbajtur këtë të hënë në Gjykatën Themelore të Prishtinës për përleshjen e ndodhur gjatë vitit të kaluar në Kuvend, zëvendëskryeministri Besnik Bislimi, ministri i Financave, Hekuran Murati dhe deputetët e Partisë Demokratike të Kosovës, Hajdar Beqa, Bekim Haxhiu janë pajtuar që rastin gjyqësor për ta zgjidhin nëpërmjet ndërmjetësimit.

Vitin e kaluar, Prokuroria kishte ngritur aktakuzë ndaj zëvendëskryeministrit Bislimit dhe deputetëve të PDK-së, Beqa, Lushtaku dhe Bekim Haxhiut për këtë rast.

Bislimi, Lushtaku dhe Haxhiu ngarkohen për veprën penale “Sulmi, ndërsa Beqa gjithashtu ngarkohet me veprën penale “Asgjësimi apo dëmtimi i pasurisë”.

Ndërsa për deputetin Haxhiu ekziston dyshimi i bazuar se ka kryer veprën penale “Lëndimi i lehtë trupor”.

“Prokurori i Shtetit me rastin e ngritjes së aktakuzës i ka propozuar Gjykatës që të pandehurit të shpallen fajtorë dhe të dënohen sipas ligjit për veprat penale të cilat iu vihen në barrë”, pati njoftuar Prokuroria.

Si rrodhi ngjarja?

Situata në parlament kishte eskaluar fillimisht pasi deputetja e Partisë Demokratike të Kosovës, Ganimete Musliu, vendosi një letër ku kryeministri Albin Kurti dukej me hundë të zgjatur – që karakterizon personazhin e “Pinokiut” – që përdoret si simbolikë e gënjeshtarit, në një kohë kur ai po fliste për situatën në Veri të Kosovës.

Më këtë veprim të deputetes Musliu, nuk u pajtua zëvendëskryeministri i Kosovës, Besnik Bislimi, i cili u ngrit nga ulësja e tij ku po qëndronte, dhe doli për ta larguar atë letër vetëm pas disa sekondave.

Ky akt i Bislimi provokoi situatën edhe më tej; pasi Mërgim Lushtaku, nga PDK, si kundërpërgjigje ndaj vendimit të Bislimit hodhi ujë në drejtim të Kurtit fillimisht – i cili po fliste në foltoren e kuvendit – dhe më pastaj vartësit të tij Bislimit, derisa ky i fundit iu kundërpërgjigj duke e goditur me shishe të ujit deputetin Lushtaku.

Situata agravoi në përleshje fizike pasi deputetët e PDK-së u përplasën me disa nga ministrat e qeverisë Kurti dhe deputetët e mazhorancës.

Nuk munguan as grushtet e shtyrjet.

Pas tensionimit të situatës në sallën e Parlamentit të Kosovës intervenoi edhe mbrojtja e afërt e kryeministrit me qëllim; ndalimin e përleshjeve të mëtejme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.