Gjukanoviç thotë se anëtarësimi i Malit të Zi në “Ballkanin e Hapur” është kthim nën Serbi

Presidenti i Malit të Zi, Milo Gjukanoviç, ka deklaruar se anëtarësimi i Malit të Zi në nisëm “Ballkani i Hapur” është kthim nën “Serbinë e Madhe”.

“Është një agresion i poshtër”, ka thënë fillimisht Gjukanoviç teksa po fliste për nismën “Ballkani i Hapur”, që sipas tij “donte ta nxirrte Malin e Zi nga plejada politike evropiane dhe euroatlantike dhe ta kthente nën ‘Serbinë e Madhe’, nën ombrellën e sigurisë së ‘Rusisë së Madhe’”.

Ai shtoi se Qeveria e Malit të Zi, në krye me Dritan Abazoviç-in, ka komprometuar Malin e Zi si vend anëtar i NATO-s përmes rrjedhjes së pakontrolluar të të dhënave të sigurisë dhe ka mirëmbajtur rrjetin serbo-rus në Mal të Zi.

“Gjatë periudhës së fundit, ne pamë përpjekjet e dëshpëruara të qeverisë së re për të çmontuar plotësisht sistemi i sigurisë, duke përfshirë Agjencinë Kombëtare të Sigurisë si institucionin më të rëndësishëm të sistemit të sigurisë, për të ruajtur rrjetin serbo-rus në Mal të Zi dhe për të mbrojtur përfaqësuesit e qeverisë së re nga keqbërjet e tyre kriminale”, nënvizoi shefi i shtetit gjatë fjalimit të tij në kuvendin e koalicionit të Plavës për zgjedhjet lokale.

Presidenti malazez ka folur edhe për ngritjen e tensioneve nacionaliste në Ballkanin Perëndimor,

“Nacionalistët kanë ngritur sërish kokën”, theksoi Gjukanoviç duke shtuar se “ajo që po ndodh në skenën globale përmes përshkallëzimit midis Lindjes dhe Perëndimit, dhe veçanërisht nën dritën e agresionit rus kundër Ukrainës, është shans i ri për ta”.

“Ata nuk arritën në përfundimin se politikat nacionaliste dështuan përfundimisht në vitet ’90, por se nuk ia dolën asokohe sepse mjedisi ishte i pafavorshëm dhe se tani po u krijohet një shans i ri”, përfundoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.