Fernando Santos: Është koha që ta lënë të qetë Cristiano Ronaldo-n

Është koha e duhur për ta lënë të qetë Cristiano Ronaldo-n, thotë trajneri i Portugalisë, Fernando Santos.

Gazeta portugeze, Record pretendoi se Ronaldo kërcënoi të largohej nga Kupa e Botës pasi iu tha se nuk do të fillonte në fitoren në 1/8 kundër Zvicrës.

Federata Portugeze e Futbollit (FPF) mohoi një incident të tillë që përfshinte 37-vjeçarin dhe Santos shpjegoi bisedën që dyshja kishin.

“Ai kurrë nuk më ka thënë se donte të largohej nga kombëtarja jonë”, tha Santos.

“Është koha të ndalemi me këtë bisedë, të ndalojmë polemikat”.

“Është koha që ju ta lini vetëm Ronaldo-n, në shenjë mirënjohjeje për atë që ai ka bërë për futbollin portugez”.

Santos, i cili po fliste para çerekfinales të së shtunës kundër Marokut, gjithashtu shpjegoi bisedën që u zhvillua kur i tha kapitenit të Portugalisë, Ronaldo se do ta linte rezervë kundër Zvicrës.

“Unë fola me të pas drekës në ditën e lojës dhe e ftova në zyrën time”, tha Santos.

“Për arsye të qarta, Cristiano nuk ishte shumë i lumtur për këtë pasi ai ka qenë gjithmonë lojtari titullar”.

“Ai më tha: ‘A mendon vërtet se është një ide e mirë?’

“Por ne patëm një bisedë normale në të cilën unë shpjegova pikëpamjet e mia dhe natyrisht ai i pranoi ato. Ne patëm një bisedë të sinqertë dhe normale”.

Ronaldo u largua nga Manchester United me marrëveshje të përbashkët përpara hapjes së Kupës së Botës të Portugalisë pas një interviste të diskutueshme në të cilën pesë herë fituesi i Topit të Artë kritikoi ashpër klubin.

Ai u zëvendësua në të dyja ndeshjet hapëse të Portugalisë dhe Santos kishte thënë se “nuk i pëlqeu” reagimi i Ronaldo-s kur ai u zëvendësua përsëri gjatë humbjes 2-1 në grup nga Koreja e Jugut.

Goncalo Ramos startoi në vend të Ronaldo-s kundër Zvicrës dhe 21-vjeçari shënoi një hat-trick në fitoren 6-1.

Ronaldo, i cili është lojtari me më së shumti paraqitje të Portugalisë (195) dhe golashënuesi më i mirë i të gjitha kohërave (118), u përdor si zëvendësues i vonë në atë lojë, por më pas u largua nga fusha ndërsa shokët e tij të skuadrës ende festonin fitoren.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.