Apeli konfirmon aktakuzën ndaj ish-ministres Hoxha dhe zyrtareve të tjerë

Gjykata e Apelit ka konfirmuar aktakuzën ndaj ish-ministres së Integrimit Evropian, Dhurata Hoxha, si dhe shefit të prokurorimit të kësaj ministrie, Fitim Mustafa, e tre ish sekretarëve: Demush Shasha, Nuhi Osmani e Kushtrim Cukaj.

Të pandehurit akuzohen për veprën penale ‘keqpërdorim i pozitës zyrtare’, derisa në njoftimin e Apelit thuhet se mbrojtësve të tyre u janë refuzuar ankesat si të pabazuara.

“Prokurori i Apelit ka propozuar që ankesat e mbrojtësve të të pandehurve të refuzohen si të pabazuara dhe aktvendimi i ankimuar të vërtetohet”.

“Akuza për keqpërdorim të autoritetit zyrtar është e turpshme. Është e turpshme që prokuroria të bie në ndikimin e disa mediave”, kishte thënë ish-ministrja për Integrime Evropiane, Dhurata Hoxha, në një prononcim për Albanian Post, kur është pyetur për njoftimin se Prokuroria Speciale ka ngritur aktakuzë për të.

Më 27 tetor, edhe Gjykata Themelore në Prishtinë e ka konfirmuar aktakuzën për korrupsion ndaj sajë dhe katër personave të tjerë.

Ndryshe, të akuzuarit ishin deklaruar të pafajshëm në seancën e shqyrtimit fillestarë të mbajtur më 1 shtator të këtij viti.

Sipas aktakuzës së ngritur më 7 korrik 2021, nga Prokuroria Speciale e Republikës së Kosovës, Dhurata Hoxha, Kushtrim Cukaj dhe Fitim Mustafa janë akuzuar se në vazhdimësi kanë kryer veprën penale “Keqpërdorimi i pozitës apo autoritetit zyrtar” nga neni 414, paragrafi 2 lidhur me nenin 77 paragrafi 1 të KPRK-së.

Kurse, Demush Shasha dhe Nuhi Osmani po akuzohen se kanë kryer veprën penale “Keqpërdorimi i pozitës apo autoritetit zyrtar’’.

Në aktakuzë thuhet se Hoxha në cilësinë e ministres së MIE-së, kishe tejkaluar kompetencat e saj me qëllim të përfitimit të dobisë pasurore personit tjetër, respektivisht operatorëve ekonomik “Majorelle PR & Events” dhe “Madison Strategies LLC”.

Siç thuhet në aktin akuzues, Hoxha më 11 maj 2018 kishte kërkuar nga Sekretari i Përgjithshëm i MIE-së, Demush Shasha nisjen e procedurave të prokurimit për aktivitetin e prokurimit “Shërbime të konsulencës për nevojat e MIE-së”, duke përcaktuar procedurën që duhej aplikuar dhe emrin e “Majorelle PR & Events” me të cilin duhej lidhur kontrata.

Sipas aktakuzës, e njëjta e bëri këtë edhe pse e kishte ditur se sipas ligjit këto nuk ishin në kompetencë të ministrit, me ç’rast ata i kanë mundësuar këtij operatori lidhjen e kontratës në vlerë 180 mijë euro dhe si rrjedhojë edhe përfitimin e dobisë pasurore në këtë vlerë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.