Rusia të fillojë tërheqjen e trupave për Krishtlindje, sugjeron Zelensky

Rusia mund të fillojë tërheqjen e trupave të saj nga territori i Ukrainës gjatë Krishtlindjes, duke treguar kështu aftësinë e saj për të hequr dorë nga agresioni.

Presidenti i Ukrainës, Volodymyr Zelenskyy e deklaroi këtë në një fjalim drejtuar udhëheqësve të G7-ës.

“Ne i ofrojmë Rusisë që të ndërmarrë një hap konkret dhe kuptimplotë drejt zgjidhjes diplomatike, për të cilën flitet kaq shpesh në Moskë. Unë sugjeroj që Rusia të paktën të përpiqet të provojë se është e aftë të heqë dorë nga agresioni. Do të ishte e drejtë të fillonte tërheqja e trupave ruse këtë Krishtlindje”, tha Zelenskyy.

Ai shtoi se nëse Rusia tërheq trupat e saj nga Ukraina, ajo do të sigurojë një ndërprerje të besueshme të armiqësive.

“Shpresoj se do ta mbështesni thirrjen tonë. Sepse ky është një interes global. Dhe kjo është pjesë e formulës sonë të paqes. Okupatori duhet të largohet. Sigurisht që do të ndodhë. Dhe nuk shoh asnjë arsye pse Rusia nuk duhet ta bëjë këtë tani, në Krishtlindje”, vuri në dukje presidenti ukrainas.

Ai sugjeroi gjithashtu thirrjen e një samiti të posaçëm, Samitin Global të Formulës së Paqes, “për të vendosur se si dhe kur mund të zbatohen pikat e formulës së paqes në Ukrainë”.

Udhëheqësit e “Grupit të Shtatë” në një takim virtual të hënën, në të cilin mori pjesë Presidenti Zelensky, ranë dakord të vazhdojnë mbështetjen e Ukrainës, përfshirë mbështetjen financiare, në luftën e saj në shkallë të plotë me Rusinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.