Rusia nuk ka humbur asgjë që nga 24 shkurti, thotë Putin

Presidenti rus Vladimir Putin deklaroi se Federata Ruse nuk ka humbur asgjë që nga fillimi i luftës në Ukrainë.

Lajmi u bë i ditur nga agjencia shtetërore “RIA Novosti”, duke iu referuar fjalimit të Putin-it në seancën plenare të Forumit Ekonomik Lindor në Vladivostok.

“Jam i sigurt se Federata Ruse nuk ka humbur asgjë që nga 24 shkurti, por fitimi kryesor është forcimi i sovranitetit. Rusia është një shtet sovran, ne gjithmonë do të mbrojmë interesat tona kombëtare duke ndjekur një politikë të pavarur”,u shpreh fillimisht shefi i Kremlinit.

Presidenti rus shtoi gjithashtu se Rusia “do të përmbushë plotësisht detyrën e saj për të mbrojtur Donbas-in”, “do të forcohet nga jashtë dhe nga brenda”.

Përveç kësaj, Putin është i sigurt se është e pamundur të izolohet Rusia, pasi “vendi, duke përdorur avantazhet e tij konkurruese natyrore, do të vazhdojë të rrisë potencialin e tij të transportit, të zgjerojë rrjetin e autostradave dhe hekurudhave, të ndërtojë qasje të reja për terminalet detare dhe të rrisë kapacitet”.

Ai siguron se Rusia është plotësisht e aftë t’i sigurojë vetes burime natyrore.

Sipas Putin-it, Distrikti Federal i Lindjes së Largët luan një rol të rëndësishëm në këtë.

Kjo, pasi është furnizuesi më i rëndësishëm i naftës, gazit natyror, qymyrit, metaleve, pyjeve dhe burimeve biologjike ujore si për tregun vendas ashtu edhe për partnerët e huaj.

“Para së gjithash”, tha ai “energjia ruse duhet të përdoret për zhvillimin e brendshëm. Por bashkëpunimi me Rusinë në këtë fushë është një gjë e mirë për Evropën. Kërkesa për hidrokarbure është e lartë në botë dhe Evropa kishte një avantazh konkurrues të lidhur me furnizimet me energji nga Rusia. Jemi të gatshëm të bashkëpunojmë me çdo vend, por tashmë tregu europian nuk është më i favorshëm. Rusia nuk e ka problem të shesë burimet e saj: kërkesa në Kinë po rritet, për shembull, dhe ne do ta shesim gazin tonë në të gjithë botën”.

Në të njëjtën kohë, presidenti rus beson se Perëndimi po hedh poshtë gjithçka “në emër të unitetit famëkeq”.

“Niveli i arritur i zhvillimit industrial në Evropë, cilësia e jetës së njerëzve, stabiliteti socio-ekonomik – e gjithë kjo është hedhur në furrën e sanksioneve, paguar me udhëzime nga Washingtoni në emër të famëkeqit unitet euroatlantik dhe në fakt sakrifikohet për ruajtjen e diktaturës së Shteteve të Bashkuara në çështjet botërore”.

Sipas presidentit rus, në pranverë shumë korporata të huaja njoftuan tërheqjen e tyre nga Rusia dhe sot “një nga një fabrikat dhe vendet e punës po mbyllen në Evropë”.

Putin është i sigurt se një nga arsyet për këtë është “shkëputja e lidhjeve të biznesit me Rusinë”, duke thënë se “autoritetet e BE-së po privojnë ndërmarrjet evropiane nga burimet e gjuetisë, lëndët e para dhe tregjet e shitjes”.

Sulmi ndaj Evropës vazhdoi : “Propozimet për një tavan të çmimit të gazit janë marrëzi dhe do të çojnë në çmime më të larta. Për momentin, gazsjellësi Nord Stream 1 është praktikisht i mbyllur, por ne mund të nisim sërish Nord Stream 2 nesër, mjafton të shtypim një buton, por nuk lejohet: sanksionet ndaj këtij gazsjellësi janë vendosur nga amerikanët, që duan të shesin gazin e tyre, me një çmim më të lartë. Rusia nuk e përdor energjinë e saj si armë”.

Ai akuzoi gjithashtu SHBA-të për minimin e themeleve të rendit ekonomik botëror.

Putin shtoi se “Perëndimi kërkon të ruajë rendin botëror që është i dobishëm për të, sipas rregullave të shpikura prej tij”.

Forumi Ekonomik Lindor zhvillohet më 5-8 shtator në kampusin e Universitetit Federal të Lindjes së Largët në ishullin Russky në Vladivostok.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.