Rritja e çmimeve për finalen e Conference League, reagon Autoriteti i Konkurrencës: Shkelësit do ndëshkohen

Autoriteti i Konkurrencës ka reaguar në lidhje me ngjarjet e fundit që kanë bërë bujë në media, ku shumë hotele, kryesisht në Tiranë, kanë ngritur ndjeshëm çmimet për finalen e UEFA Conference League.

Ndeshja finale do të zhvillohet në “Air Albania”, më 25 maj, dhe pritet të vijnë shumë tifozë nga Italia dhe Holanda, pasi Roma dhe Feyenoord-i përballen për trofeun.

Autoriteti bën me dije se të gjithë ato struktura që do të ngrenë çmimet për të përfituar nga ndeshja do të ndëshkohen me gjoba.

Njoftimi i plotë:

“Nisur nga disa informacione shqetësuese në media në lidhje me rritjen e menjëhershme të çmimeve nga ana e ndërmarrjeve që ofrojnë shërbimin e hotelerisë apo akomodime të tjera të ngjashme në qytetin e Tiranës, në kuadër të ndeshjes finale të Ligës së Konferencës midis skuadrave Roma-Feyenoord, e cila do të zhvillohet në Tiranë në datën 25 maj 2022, Autoriteti i Konkurrencës vendosi monitorimin e këtij tregu.

Nga monitorimi i platformave online që ofrojnë rezervime ambientesh fjetje si dhe nga monitorime në terren u identifikuan çmime tepër të larta për datat 23-25 maj 2022, krahasuar me periudha të tjera të vitit.

Autoriteti i Konkurrencës iu kërkon ndërmarrjeve që ofrojnë shërbimin e  fjetjes në hotele dhe akomodime të ngjashme në qytetin e Tiranës:

-të ofrojnë shërbime me çmime të arsyeshme, të orientuara drejt kostos;

-të mos anulojnë rezervimet e hershme me qëllim rishitjen në minutën e fundit me çmime disa herë më të larta.

Autoriteti i Konkurrencës iu bën me dije ndërmarrjeve që ofrojnë shërbimin e  fjetjes në hotele dhe akomodime të ngjashme  në qytetin e Tiranës që, nëse në përfundim të hetimit rezulton se rritja në mënyrë të menjëhershme dhe të pajustifikuar e çmimit të shërbimit të fjetjes në hotele dhe akomodime të ngjashme do të gjendet në kundërshtim me dispozitat e ligjit nr.9121/2003 “Për mbrojtjen e Konkurrencës”, shkelësit e ligjit do të ndëshkohen me gjoba deri ne 10% të xhiros së vitit financiar paraardhës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.