Pentagoni: Asnjë trupë amerikane nuk do të ndëshkohet për sulmin me dron në Afganistan

Shtetet e Bashkuara kanë thënë se asnjë trupë ushtarake apo zyrtar amerikan nuk do të ndëshkohet për sulmin me dron, ku mbetën të vrarë dhjetë persona – përfshirë shtatë fëmijë – në Afganistan gjatë muajit gusht.

Sulmi ndodhi gjatë ditëve të fundit të evakuimit të Kabulit të udhëhequr nga SHBA-të pasi talebanët morën kontrollin.

Inteligjenca amerikane kishte besuar se makina e punonjësit të ndihmës ishte e lidhur me IS-K, një degë lokale e Shtetit Islamik.

Por, pas kësaj, gjenerali i Komandës Qendrore të SHBA-ve, Kenneth McKenzie, e përshkroi sulmin e 29 gushtit si një “gabim tragjik”.

Një rishikim i brendshëm i nivelit të lartë, i botuar muajin e kaluar, arriti në përfundimin se nuk kishte nevojë për masa disiplinore, pasi nuk ishte shkelur asnjë ligj dhe nuk kishte prova për sjellje të pahijshme ose neglizhencë.

Disa media amerikane raportuan se rishikimi u miratua të hënën nga Sekretari i Mbrojtjes, Lloyd Austin.

Sulmi ndodhi disa ditë pasi një sulm vetëvrasës vrau deri në 170 civilë dhe 13 trupa amerikane jashtë Aeroportit të Kabulit.

Forcat amerikane kishin vënë në shënjestër një makinë që i përkiste punonjësit të ndihmës Zamairi Ahmadi dhe sulmi u nis pasi u tërhoq në rrugën e shtëpisë së tij, 3 km (1.8 milje) nga aeroporti.

Automjeti ishte parë në një kompleks të lidhur me IS-K dhe lëvizjet e tij ishin në përputhje me inteligjencën tjetër në lidhje me planet e grupit terrorist për një sulm tjetër.

Megjithatë, një hetim zbuloi se ka shumë të ngjarë që shpërthimit të ishte shkaktuar nga një rezervuar propan në rrugë.

Kush janë IS-K

Isis -K – ose siç quhet ndryshe, Provinca Khorasan e Shtetit Islamik (ISKP) – është degë rajonale e Shtetit Islamik (IS) që është aktiv në Afganistan dhe Pakistan.

Ky është grupi më ekstrem dhe më i dhunshëm nga të gjitha grupet militante xhihadiste në Afganistan.

U krijua në janar të vitit 2015 në kulmin e fuqisë së IS-it në Irak dhe Siri, para se kalifati i saj i vetëshpallur të ishte “çmontuar” nga një koalicion i udhëhequr nga SHBA-të.

Ai rekruton persona nga xhihadistët afganë edhe nga ato pakistanezë, veçanërisht nga anëtarët e talebanëve afganë të cilët kanë parë organizatën e tyre si ekstreme.

Isis-K janë fajësuar për disa nga mizoritë më të këqija në vitet e fundit, duke synuar shkollat ​​e vajzave, spitalet dhe madje edhe një maternitet ku ata thuhet se vranë gra shtatzëna dhe infermiere.

Ndryshe nga talebanët, interesi i të cilëve është i kufizuar në Afganistan, Isis-K janë pjesë e rrjetit global të IS-it që kërkon të kryejë sulme ndaj objektivave perëndimorë, ndërkombëtarë dhe humanitarë kudo që ata mund t’i arrijnë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.