Nëse jeni të infektuar me COVID-19 dhe ju është kërkuar të kujdeseni për veten, ose për dikë që është i sëmurë në shtëpi, por nuk dini si duhet të veproni që t’i mbani të gjithë të sigurt.
Dilemave të tilla u ka dhënë fund doktoresha April Baller, specialiste e Shëndetit Publik në Organizatën Botërore të Shëndetësisë.
Përmes një video të publikuar nga OBSH, Baller ka folur për kujdesin e pacientëve me COVID-19, në shtëpi, dhe ka treguar për gjërat me të cilat mund të përballen pacientët ose njerëzit që kujdesen për ta.
Ajo tha se “kur ka rritje të rasteve në komunitet, dhe kapaciteti i shtretërve brenda spitalit është pothuajse i mbushur”.
Sipas saj, “në këtë rast, ajo që mund të bëjnë mjekët, është t’u japin pacientëve trajtim dhe këshilla që, më pas, ata të kujdesen për veten e tyre në shtëpi”.
Baller ka shtuar se ka raste kur pacientët rezultojnë pozitivë, megjithatë, ata nuk kanë ndonjë simptomë ose kanë simptoma shumë të lehta, këta njerëz mund të vazhdojnë trajtimin në shtëpi.
“Pika e parë është që personi duhet të qëndrojë në një dhomë të veçantë. Nëse kjo nuk është e mundur, atëherë ata duhet të kenë një pjesë të caktuar të shtëpisë dhe lëvizjet rreth asaj zone të shtëpisë duhet të jenë të kufizuara. Gjithashtu, duhet të mbahet të paktën një metër distancë midis tyre dhe kujtdo tjetër”.
“Së dyti, është thelbësore që të ketë ventilim të mirë në dhomën e atij pacienti dhe çdo hapësirë të përbashkët, kjo do të thotë të ketë sa më shumë ajër të pastër kjo mund të bëhet vetëm duke hapur dritaret”, u shpreh Baller.
Ajo theksoi se është e rëndësishme të jetë vetëm një person që kujdeset për atë pacient, sa herë që pacientët marrin kujdes, ata duhet të mbajnë një maskë mjekësore, ashtu si dhe kujdestari dhe sa më shpejt që kujdestari të largohet nga dhoma, ata duhet të sigurohen të lajnë duart.
“Pacientët duhet të kenë të personalizuar, enët dhe gotat, peshqirët dhe çarçafët. Dhe këto mund të lahen me ujë dhe sapun të paktën një herë në ditë. Gjithashtu e rëndësishme është që, çdo sipërfaqe që preket shpesh nga pacienti, duhet të pastrohet dhe dezinfektohet çdo ditë dhe çdo mbetje e krijuar nga ai pacient duhet të paketohet në mënyrë të sigurt”.
Doktoresha u pyet se cila mund të jetë shenja që do t’i tregojë një pacienti me COVID-19 ose kujdestarit të tij se është koha për të telefonuar mjekun.
“Kur kujdeseni për pacientët në shtëpi, është e rëndësishme të monitoroni rregullisht gjendjen. Shenjat paralajmëruese mund të ndryshojnë pak në varësi të moshës. Pra, shenjat përfshijnë frymëmarrje të rëndë, ankesa për dhimbje gjoksi, si dhe pamje të dehidratuar”, ka shtuar ajo.
“Për fëmijët, shpesh mund të jenë: buzë dhe fytyrë të kaltër, shfaqen si të hutuar. Kurse foshnjat, tregojnë një paaftësi për t’u ushqyer me gji. Pra, në ndonjë prej këtyre rasteve, duhet kujdes urgjent”.
Baller tregoi edhe për një pajisje që ju duhet në shtëpi në këto raste.
“Ndërsa janë në shtëpi, nga disa pacientë mund të kërkohet të matin ngopjen e oksigjenit me një oksimetri të pulsit. Kjo është një pajisje mjekësore që monitoron nivelin e oksigjenit në gjak”.
“Është një pajisje shumë e dobishme. Sidoqoftë, është e rëndësishme që përdoruesi të ketë udhëzime të qarta se si ta përdorë atë dhe po ashtu të dijë se çfarë është një lexim jo normal ose një masë normale. Dhe kur kjo ndodh, e rëndësishmja, ata duhet të telefonojnë urgjentisht ofruesin e tyre të kujdesit shëndetësor”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
