‘Ditët e Bujqësisë’: Bashkëpunim rajonal me fokus fuqizimin e bujqësisë dhe zhvillimin rural

Ministrja e Bujqësisë dhe Zhvillimit Rural, Anila Denaj, ka zhvilluar një takim me Ministrin e Bujqësisë, Pylltarisë dhe Zhvillimit Rural, të Kosovës, Faton Peci, Sekretarin e Përgjithshëm të Ministrisë së Bujqësisë së Malit të Zi,  Salih Gjonbalaj, Atasheu gjerman për bujqësinë,  si dhe Boban Ilic, Sekretar i Përgjithshëm i SWG-së, ku diskutuan mbi bashkëpunimin rajonal me fokus fuqizimin e  bujqësisë dhe zhvillimin rural në Ballkan.

Denaj ka theksuar se tanimë ekipi ka një objektiv të qartë: integrimi evropian. “Secili nga vendet tona ka bërë progresin për përafrimin ligjor, por njëkohësisht ky përafrim ligjor nuk mund të konceptohet pa bashkëpunimin e politikëbërjes dhe bizneseve”.

Peci, nga ana tjetër, ka shprehur dakordësinë e plotë me këtë nismë.

Ai ka thënë se “orientimi strategjik i rajonit është integrimi në proceset evropiane, në këtë rast synimi ynë si vend i Ballkanit Perëndimor është që ne duhet të jemi pjesë e Bashkimit Evropian”.

“Për këtë na duhet një koordinim më i ngushtë në të gjitha fushat. Është shumë në interes që të shohim mundësitë që sa më shumë të ketë iniciativa siç është Panairi i Lushnjës edhe në prezencën e sa më shumë fermerëve, jo vetëm të institucioneve të vendeve të rajonit”.

Po ashtu Gjonbalaj ka theksuar se Mali i Zi e mbështet fuqishëm këtë iniciativë.

“Ne monitorojmë me kujdes të gjitha pozicionet përkatëse dhe punojmë në mënyrë aktive për të përforcuar vetë procesin. Ne jemi të gatshëm të ndërmarrim të gjitha hapat e nevojshëm për të ruajtur momentin dhe për të dhënë një kontribut në bashkëpunimin dhe stabilitetin rajonal”.

Sipas tij, Mali i Zi mbështet hapur dhe drejtpërdrejtë integrimin ekonomik rajonal dhe kontribuon në zbatimin e agjendës së reformave për tregtinë dhe konkurrencën brenda CEFTA-s në përputhje me kërkesat e procesit të përafrimit me BE-në.

Kurse Ilic ka falënderuar për bashkëpunimin konstruktiv dhe sigurisht mbështetjen politike të bashkëpunimit rajonal të secilit vend, dhe mbështetjen e qeverisë gjermane.

“Ne do të dëshironim që bujqësia të përfshihej në procesin e Berlinit. Kjo do të jepte jo vetëm ndërveprimin e Gjermanisë dhe Francës dhënien e sinjalit të qartë edhe vendeve fqinje të Ballkanit Perëndimor po ashtu si edhe vendeve mbështetëse të procesit të Berlinit  si Austria dhe Italia për të pasur një agjendë të qartë në atë çfarë ne duhet të punojmë”.

Takimi sakaq u zhvillua në kuadër të panairit të Lushnjës “Ditët e Bujqësisë”, që tashmë shihet si një mundësi e çmuar për të rrahur ide dhe përçuar mesazhet e nevojshëm nga  politikëbërës, ekspertë të fushës, partnerë të huaj e donatorët nga Shqipëria dhe vendet e rajonit në drejtim të objektivave të përbashkët për zhvillimin e qëndrueshëm të bujqësisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.