Ndahet nga jeta ikona e artit grek, Tolis Voskopoulos

Pas një arresti kardiak, është ndarë nga jeta në moshën 81-vjeçare ikona e artit grek, Tolis Voskopoulos.

Voskopoulos kishte një bagazh të pasur të muzikës, duke u renditur në kulmet e diskografisë greke. Numërohen mbi 80 disqe të incizuara nga ai.

Edhe pse famën e tij kryesore e fitoi nga suksesi në muzikë, aktrimi ishte pasioni i përhershëm i Tolisit, teksa për herë të parë në një skenë teatrale është shfaqur qysh në vitin 1958, kur ishte vetëm 18 vjeç.

Në 1963, ai bëri debutimin e tij në film.

Në të njëjtën kohë, ai shkoi në një kolegj konservator për të mësuar muzikë.

Dashuria e tij për teatrin ishte aq e madhe dhe as talenti për aktrim nuk i mungonte, sepse Voskopoulos kishte luajtur në shfaqje teatrale përkrah aktorëve më të suksesshëm grek të tillë, si: Vlachopolou, Vassiliadou, Hatzcichristos e Avlonitis.

Vite më vonë, ai u përqendrua në sferën e muzikës, ndërsa këngë si “Dashnorët e ëndrrave” bashkëpunimi i tij me Zoe Laskarin, që u publikua në fillim të viteve të 70-ta, si dhe “Kënga teatrale”, e hedhur në treg në prag të viteve të 80-ta në bashkëpunim me Maria Aliferin, ishin mes këngëve që fituan epitetin e “hiteve” në diskografinë greke.

Lidhjen e ngushtë me teatrin ai e ka theksuar edhe gjatë një interviste të dhënë së fundmi për një media greke, gjatë të cilës kishte thënë se, “Më mungon teatri, e dua të qenit aktor”.

Tolis Voskopoulos ishte i martuar me politikanen greke, Angela Gerekou, ndërsa vdiq pak ditë para ditëlindjes së tij, të cilën do ta festonte më datë 26 korrik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.