Marrëveshja me Italinë: Qendrat në Shqipëri hapen më 20 maj, dritëhijet e tenderit italian

Gjithçka duhet të jetë gati deri më 20 maj.

Faza e fundit e fushatës elektorale për zgjedhjet evropiane do të duhet të mbulohet me premtimin e mbajtur, qendrat e azilkërkuesve në Shqipëri të hapura dhe funksionale.

Dhe pak rëndësi ka nëse, në mungesë të vendimit themelor të Gjykatës Evropiane të Luksemburgut, gjyqësori italian mund të ndalonte gjithçka menjëherë.

Është një rrezik që Qeveria italiane synon të marrë.

E përditshmja italiane “Repubblica” shkruan se edhe nëse nuk rezulton se inxhinierët ushtarakë italianë kanë nisur punën për strukturat përtej Adriatikut, Ministria e Brendshme italiane vazhdon punën duke publikuar tenderin për menaxhimin e qendrave.

Kjo me një procedurë jashtëzakonisht urgjente (nuk kuptohet se nga cilat kushte diktohet), negociata mes tre operatorëve ekonomikë, vetëm një javë për të zyrtarizuar shprehjen e interesit.

Njoftim me metoda jo aq ligjore

Njoftimi i publikuar (pa asnjë reklamë në faqen e Ministrisë së Brendshme) më 21 mars, afati i fundit është caktuar më 28 mars.

Metoda vërtet unike, në kundërshtim të dukshëm me kodin e prokurimit, për një tender mjaft të konsiderueshëm, me vlerë 34 milionë euro në vit, “për caktimin e shërbimeve të pritjes për funksionimin dhe menaxhimin e qendrave të pritjes dhe paraburgimit”.

34 milionë të cilave do t’i shtohet rimbursimi në fund të listës së kostove të transportit, mirëmbajtjes së jashtëzakonshme dhe të zakonshme, shërbimeve komunale, grumbullimit të mbetjeve, kujdesit shëndetësor, dhe për rrjedhojë të destinuara për t’u rritur më tej.

Si do të funksionojnë

Funksionimi i qendrave është planifikuar si më poshtë: në hotspot-in në portin e Shëngjinit emigrantët nuk do të qëndrojnë gjatë natës, do të qëndrojnë aty vetëm për kontrollin shëndetësor, identifikimin dhe mbledhjen e kërkesave për azil.

Në qendrën e Gjadrit, ku janë planifikuar 880 vende, azilkërkuesit në paraburgim administrativ do të presin (teorikisht brenda një muaji) rezultatin e aplikimit të tyre sipas procedurave të përshpejtuara kufitare të parashikuara për ata që vijnë nga vende të sigurta.

Në një tjetër të së njëjtës qendër, janë planifikuar 144 vende të tjera si CPR, ku do të transferohen me rrugë rrugore ata të destinuar për riatdhesim.

Gjithashtu sigurohet një lidhje audio-video në distancë për t’i lejuar migrantët të kenë seanca dëgjimore përpara komisioneve të azilit dhe para gjyqtarëve të gjykatës së Romës përgjegjëse për çdo apelim.

Marrëveshja

Qeveria shqiptare, të martën e 7 nëntorit, ka zbardhur Protokollin e firmosur ndërmjet qeverisë së Republikës italiane dhe Këshillit të Ministrave të Republikës së Shqipërisë.

Kështu bëhet me dije se marrëveshja për strehimin e emigrantëve – të kapur në det nga Italia  – në dy qendrat e ndërtuara në Shqipëri, do të zgjasë plot pesë vite.

Shpenzimet për këtë vendim politik deri më tani do të përballohen nga Italia, e cila do t’i paguajë Shqipërisë fondin e parë në shumën 16.5 milionë euro, brenda një 3-mujori.

Parashikohet që mbi 100 milionë euro të jenë të ngrira në një llogari bankare të nivelit të dytë si garanci.

Italia, ndërkaq merr përsipër të gjitha shpenzimet për kujdesin spitalor sipas legjislacionit shqiptar, pas administrimit të trajtimeve spitalore të palës shqiptare.

Neni 3 i kësaj marrëveshjeje përcakton se shteti fqinj merr në përdorim sipërfaqe të territorit shqiptar për ngritjen e strukturave pritëse të cilat parashikohen të ngrihen në Shëngjin dhe në Gjadër.

Neni 4, që është pika kryesore e këtij protokolli thekson se Italia ngre tërësisht me shpenzimet e saj, strukturat për qëndrimin e migrantëve.

Kufiri maksimal i pritjes së së të huajve do të jetë jo më shumë se 3 mijë persona të strehuar në të njëjtën kohë.

Gjithashtu Italia do të përballojë çdo shpenzim për të strehuarit, duke përfshirë kostot e kujdesit shëndetësor dhe tjetër të parashikuar që mund t’i vijë palës shqiptare.

Po ashtu, në dokumentin e firmosur përcaktohet se afati maksimal i qëndrimit të një emigranti nuk mund të jetë më i madh se koha e nevojshme për procedurat e azilit dhe mbrojtjes.

Në përfundim të procedurave, sipas nenit 9, është pala italiane që kryen me shpenzimet e saj largimin e migrantëve nga Shqipëria.

Shqipëria do shoqërojë emigrantët me policinë e saj dhe do vërë në dispozicion sipas rastit forcat e armatosura.

Marrë nga “Repubblica”, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.