Kurti në vizitë dy ditore në Austri, takon kancelarin Schallenberg

Kryeministri i Kosovës, Albin Kurti, ka udhëtuar për në Austri për një vizitë dyditore.

Sipas njoftimit nga zyra e kryeministrit, thuhet se Kurti do të zhvillojë takim bilateral me Kancelarin e Austrisë, Alexander Schallenberg, me të cilin do të diskutojë mbi marrëdhëniet në mes Kosovës dhe Austrisë dhe mënyrat e fuqizimit të tyre nëpërmjet rritjes së bashkëpunimit në fushat me interes të përbashkët.

“Kryeministri i Republikës së Kosovës, Albin Kurti ka udhëtuar për në kryeqytetin e Austrisë, Vjenë, për të zhvilluar një vizitë zyrtare dy ditore”, thuhet në njoftim.

“Krahas takimeve tjera zyrtare, kryeministri Kurti do të marrë pjesë edhe në diskutimin e organizuar nga Instituti “Karl Renner”, me temën ‘Kosova: Një rreze shprese për demokraci në Evropën Juglindore’, që do të mbahet të hënën e 22 nëntorit në ora 18:00”, vijon njoftimi.

Ndërkaq, më 11 nëntor të këtij viti, Kurti mori pjesë edhe në Forumin e Paqes në Paris.

Vetë Kurti pati bërë të ditur se takime ka zhvilluar edhe me liderë të ndryshëm nga rajoni dhe bota.

“Në Paris po diskutojmë për bashkëpunim dhe paqe me Presidentët Gjukanoviç e Komshiç e deri te Presidenti i Këshillit Evropian, Charles Michel e Zëvendës Presidenti i Komisionit Evropian, Josep Borrell”.

E pranishme në këtë forum ishte edhe Kryeministrja e Serbisë, Ana Bërnabiç, e cila kishte deklaruar se çështja e Kosovës do të jetë në agjendën e saj gjatë vizitës dyditore në Paris.

“Do të trajtoj edhe çështjen e Kosovës dhe trashëgiminë tonë kulturore, historike, kishat dhe manastiret në Kosovë që janë nën mbrojtjen e UNESCO-s”, ka thënë kryeministrja serbe.

Por, për çështjen e anëtarësimit të Kosovës në UNESCO, ajo konsideron se do të ishte katastrofal.

“Mendoj se anëtarësimi i Kosovës në UNESCO do të ishte katastrofik. Mendoj se do të ishte një precedent i madh dhe dihet se do të na dërgonte në shumë çështje të tjera me përmasa globale që UNESCO-s nuk i duhen”, thoshte Bërnabiç, raporton N1.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.