Financat ruse në rënie pasi SHBA-të goditën makinerinë e luftës të Vladimir Putin

Një goditje e Shteteve të Bashkuara të Amerikës (SHBA) ndaj bankave që financojnë tregtinë e mallrave për pushtimin e Ukrainës nga Vladimir Putin e ka bërë shumë më të vështirë lëvizjen e parave brenda dhe jashtë Rusisë.

Kështu të paktën shkruan “Financial Times”, e cila ka komunikuar me zyrtarët e lartë perëndimorë dhe financuesit rusë.

Vëllimet tregtare të Moskës me partnerët kryesorë si Turqia dhe Kina kanë rënë në tremujorin e parë të këtij viti pasi SHBA-të synuan bankat ndërkombëtare që ndihmonin Rusinë të blejë produkte kritike për të ndihmuar përpjekjet e saj të luftës.

Një urdhër ekzekutiv i SHBA-ve, i zbatuar në fund të vitit të kaluar, i shtyu huadhënësit të heqin dorë nga homologët rusë dhe të shmangin transaksionet në një sërë monedhash, thanë zyrtarë perëndimorë dhe tre financierë të lartë rusë.

“Është bërë më e vështirë për Rusinë që të ketë qasje në shërbimet financiare që i nevojiten për të marrë këto mallra”, tha Anna Morris, zëvendës ndihmës sekretare për çështjet globale në Thesarin e SHBA-ve.

Zbatimi i kufizimeve tani kërkon një rrjet në rritje ndërmjetësuesish.

Kjo për të shmangur kontrollin rregullator edhe nëse transaksionet nuk kanë të bëjnë fare me makinën luftarake të Rusisë.

“Po bëhet gjithnjë e më e vështirë çdo muaj. Një muaj është dollarë, muaji tjetër është euro; brenda gjashtë muajve në thelb nuk do të jeni në gjendje të bëni asgjë. Përfundimi logjik i kësaj është kthimi i Rusisë në Iran”, tha një investitor i lartë rus, duke iu referuar sanksioneve të rrepta financiare kundër Teheranit.

Urdhri ekzekutiv i SHBA-ve është krijuar për të synuar bankat në vendet që shënuan rritje të mprehta në tregtinë me Rusinë pasi perëndimi vendosi sanksione  pas pushtimit të plotë të Ukrainës nga Moska më shumë se dy vjet më parë.

Eksportet e Turqisë të mallrave “me prioritet të lartë” – artikuj kryesisht për përdorim civil, por të identifikuar si kritikë për përpjekjet e luftës, si mikroçipet – drejt Rusisë dhe pesë vendeve ish-sovjetike u rritën pas pushtimit në shkallë të plotë të Ukrainës.

Sipas Trade Data Monitor, vëllimi arriti në 586 milionë dollarë në 2023, një rritje pesëfish në krahasim me vëllimet e paraluftës.

Por në tremujorin e parë të këtij viti, eksportet e Turqisë drejt Rusisë ranë me një të tretën në 2.1 miliardë dollarë.

Rënia e mprehtë e eksporteve të lidhura me luftën i atribuohet frikës së bankave nga pasojat që mund të vijnë nga SHBA-të, të cilat mund të gjurmojnë çdo transaksion në dollarë dhe të gjymtojnë huadhënësit duke i hequr ata nga sistemi financiar i bazuar në dollarë.

Thesari mund të godasë huadhënësit me sanksione dytësore nëse dyshon se ata kanë të bëjnë me kompani që janë të ndaluara për shkak të lidhjeve të tyre me kompleksin ushtarak-industrial të Rusisë.

Kufizimet në pagesat kanë pasur një efekt përtej tregtisë në hije, pasi bankat ndërprenë kategori të tëra transaksionesh me Moskën në vend që të bien në kundërshtim me sanksionet e SHBA-ve.

Tregtarët rusë i janë drejtuar bankave më të vogla dhe monedhave alternative, pasi bankat kryesore në vende si Turqia dhe Kina i shmangen.

Vladimir Potanin, oligarku që kontrollon grupin e metaleve “Norilsk Nikel”, kohët e fundit tha se sanksionet kishin ulur të ardhurat e kompanisë me të paktën 15 për qind që nga viti 2022, pjesërisht për shkak të komisioneve prej 5 deri në 7 për qind ndaj ndërmjetësve në transaksionet e eksportit.

Marrë nga “Financial Times”, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.