Depresioni gjatë shtatzënisë: Shenjat, simptomat dhe trajtimi

Shtatzënia supozohet të jetë një nga periudhat më të lumtura të jetës së një gruaje, por për shumë gra, kjo është një kohë konfuzioni, frike, stresi, madje edhe depresioni.

Sipas Kongresit Amerikan të Obstetërve dhe Gjinekologëve, 14 deri 23 përqind e grave do të luftojnë me disa simptoma të depresionit gjatë shtatzënisë.

Depresioni është një çrregullim humori që prek një në katër gra, në një moment gjatë jetës së tyre, kështu që nuk duhet të jetë çudi që kjo sëmundje mund të prekë edhe gratë shtatzëna.

Por shumë shpesh, depresioni nuk diagnostikohet siç duhet gjatë shtatzënisë, sepse njerëzit mendojnë se është thjesht një lloj tjetër i çekuilibrit hormonal.

Ky supozim mund të jetë i rrezikshëm për nënën dhe foshnjën e palindur. Depresioni në shtatzëni është një sëmundje që mund të trajtohet dhe menaxhohet: megjithatë, është e rëndësishme që së pari të kërkoni ndihmë dhe mbështetje.

Çfarë është depresioni në shtatzëni?

Depresioni gjatë shtatzënisë, ose depresioni para lindjes, është një çrregullim humori ashtu si depresioni klinik. Çrregullimet e humorit janë sëmundje biologjike që përfshijnë ndryshime në kiminë e trurit.

Gjatë shtatzënisë, ndryshimet hormonale mund të ndikojnë në kimikatet në trurin tuaj, të cilat lidhen drejtpërdrejt me depresionin dhe ankthin.

Këto mund të përkeqësohen nga situata të vështira jetësore, të cilat mund të rezultojnë në depresion gjatë shtatzënisë.

Cilat janë shenjat e depresionit gjatë shtatzënisë?

Gratë me depresion zakonisht përjetojnë disa simptoma për 2 javë ose më shumë.

Disa nga simptomat përfshijnë: trishtim i vazhdueshëm, vështirësi për t’u përqendruar, të flesh shumë pak ose shumë, humbja e interesit për aktivitetet që zakonisht ju pëlqejnë, mendime të përsëritura të vdekjes, vetëvrasjes ose mungesës së shpresës.

Ato gjithashtu mund të përjetojnë ankth: ndjenja e fajit ose e pavlefshmërisë si dhe ndryshim në zakonet e të ushqyerit.

Cilët janë shkaktarët e mundshëm të depresionit gjatë shtatzënisë?

Probleme në marrëdhënie, histori familjare ose personale e depresionit, trajtimet e infertilitetit, humbja e mëparshme e shtatzënisë, ngjarjet stresuese të jetës, komplikimet në shtatzëni si dhe histori abuzimi ose traume.

A mundet që depresioni gjatë shtatzënisë të shkaktojë dëm për fëmijën tim?

Depresioni që nuk trajtohet mund të ketë rreziqe potenciale të rrezikshme për nënën dhe foshnjën. Depresioni i patrajtuar mund të çojë në ushqim të dobët, pije alkoolike, duhan dhe mendime vetëvrasëse, të cilat më pas mund të shkaktojnë lindje të parakohshme, peshë të ulët lindjeje dhe probleme zhvillimi.

Një grua që është në depresion shpesh nuk ka forcën ose dëshirën për t’u kujdesur në mënyrë adekuate për veten ose fëmijën e saj në zhvillim.

Foshnjat e lindura nga nëna me depresion mund të jenë më pak aktivë, të tregojnë më pak vëmendje dhe të jenë më të shqetësuar se foshnjat e lindura nga nëna që nuk janë në depresion.

Kjo është arsyeja pse marrja e ndihmës së duhur është e rëndësishme si për nënën ashtu edhe për foshnjën.

Cili është trajtimi i depresionit gjatë shtatzënisë?

Nëse mendoni se mund të jeni duke luftuar me depresionin, hapi më i rëndësishëm është të kërkoni ndihmë. Bisedoni me ofruesin tuaj të kujdesit shëndetësor për simptomat dhe vështirësitë tuaja.

A ka ndonjë ilaç të sigurt për të trajtuar depresionin gjatë shtatzënisë?

Ka shumë debate mbi sigurinë dhe efektet afatgjata të ilaçeve kundër depresionit të marra gjatë shtatzënisë.

Disa kërkime tani tregojnë se medikamente të caktuara të përdorura për trajtimin e depresionit mund të lidhen me probleme tek të porsalindurit si keqformimet fizike, problemet e zemrës, hipertensioni pulmonar dhe pesha e ulët e lindjes.

Një grua me depresion të butë deri në mesatar mund të jetë në gjendje të menaxhojë simptomat e saj me grupe mbështetëse, psikoterapi dhe terapi me dritë.

Por nëse një grua shtatzënë ka të bëjë me depresion të rëndë, zakonisht rekomandohet një kombinim i psikoterapisë dhe mjekimit.

Gratë duhet të dinë se të gjitha ilaçet do të kalojnë placentën dhe do të arrijnë tek foshnjat e tyre. Nuk ka informacion të mjaftueshëm se cilat barna janë plotësisht të sigurta dhe cilat paraqesin rrezik.

Por kur trajtohet depresioni madhor, rreziqet dhe përfitimet duhet të shqyrtohen nga afër. Ilaçet që mund të ofrojnë më shumë ndihmë, me rrezikun më të vogël për foshnjën, duhet të merren parasysh me kujdes.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.