Administrata e Biden-it nuk autorizoi bisedimet “sekrete” me rusët

Administrata e Joe Biden nuk miratoi apo mbështeti takimet sekrete të ish-zyrtarëve të Shërbimit të Sigurisë Kombëtare me ministrin e Jashtëm rus Sergei Lavrov rreth negociatave të mundshme për t’i dhënë fund luftës në Ukrainë, thanë Shtëpia e Bardhë dhe Departamenti i Shtetit.

Ish-zyrtarët amerikanë u takuan me Lavrov në New York në prill, së bashku me ish-diplomatin amerikan dhe kryetarin në largim të Këshillit për Marrëdhëniet me Jashtë, Richard Haas dhe dy ish ndihmës të Shtëpisë së Bardhë.

Nuk është e qartë se sa shpesh grupi, i cili përfshinte ish-zyrtarë të Pentagon-it, zhvilloi bisedime me rusë të tjerë të shquar që besohej se ishin afër Kremlin-it.

Të paktën një anëtar i grupit të paidentifikuar udhëtoi për në Rusi, tha NBC News.

“Administrata Biden nuk i ka miratuar ato bisedime… Dhe siç kemi thënë më parë, ne nuk do të flasim për Ukrainën pa Ukrainën”, tha një zëdhënës i Departamentit të Shtetit për agjencinë “Reuters”.

Zëdhënësi po i referohej politikës së administratës për të mos diskutuar mundësinë e negociatave për përfundimin e luftës pa përfshirjen e zyrtarëve ukrainas, transmeton agjencia britanike.

Ai shtoi se administrata do të vazhdojë të dërgojë armë në Kiev në mënyrë që zyrtarët ukrainas “të mund të negociojnë nga një pozicion i fortë kur të gjykojnë se momenti është i duhuri”.

Zëdhënësi i Sigurisë Kombëtare të Shtëpisë së Bardhë, John Kirby, tha për CBS se Shtëpia e Bardhë është në dijeni të bisedave joformale.

“Por unë dua të them qartë, ne nuk i inkurajojmë këto bisedime dhe nuk marrim pjesë në to në asnjë mënyrë… Siç tha presidenti, ne nuk do të diskutojmë Ukrainën pa Ukrainën”, tha ai.

NBC, duke cituar gjashtë persona, raportoi se qëllimi i bisedimeve ishte të vendosnin bazat për negociatat e mundshme për t’i dhënë fund luftës që shpërtheu pas pushtimit rus të Ukrainës në shkurt 2022.

Ata cituan dy burime që thanë se administrata e dinte se bisedimet po zhvilloheshin, por jo sipas udhëzimeve të saj, dhe se ata që u takuan me Lavrov-in më pas informuan Shtëpinë e Bardhë për këtë.

Ish-zyrtarët amerikanë kanë mbajtur bisedime sekrete me Lavrov-in për Ukrainën

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.