Zyrtare: Marco Reus do të largohet nga Dortmund-i

Pas 12 vitesh, Marco Reus ka vendosur të largohet nga Borussia Dortmund-i. Gjermani ka konfirmuar lajmet që qarkullonin prej muajsh.

Reus është nën kontratë me Dortmund-in deri në fund të qershorit 2024 dhe ai nuk do të ketë një marrëveshje të re në dispozicion.

Në verën e vitit 2012, Reus u transferua nga Borussia Monchengladbach në klubin e tij të fëmijërisë, dymbëdhjetë vjet më vonë “martesa e ëndrrave” mes lojtarit ofensivë dhe BVB do të përfundojë.

Reus dhe Borussia e njoftuan ndarjen këtë të premten.

“Si duhet të filloj”, iu drejtua një Marco Reus dukshëm i prekur mbështetësve të Borussia-s në kanalet e mediave sociale të BVB-së. Më pas veterani hodhi bombën: “Të dashur tifozë të BVB-së, më lejuan të jem në këtë klub për dymbëdhjetë vjet. Kam përjetuar shumë ulje-ngritje, por sipas mendimit tim, klubi dhe unë kemi marrë vendimin që të mos e vazhdojmë kontratën”.

Kontrata e Reus-it do të skadojë në fund të sezonit dhe së fundmi ka pasur shumë spekulime nëse bashkëpunimi do të vazhdonte. Nuk është ende e qartë nëse dhe ku do të vazhdojë karrierën gjermani.

Shefi i klubit, Hans-Joachim Watzke, gjithashtu shprehet në deklaratën zyrtare: “Marco Reus është një nga lojtarët më të mëdhenj në këtë klub. Ai ka lindur në Dortmund, ka luajtur në ekipin tonë të të rinjve për gati dhjetë vjet, ishte me profesionistët për dymbëdhjetë vite dhe ishte lider për një kohë të gjatë”.

“Lidhja e tij me Borussia Dortmund është e jashtëzakonshme, i urojmë Marco-s gjithë të mirat për të ardhmen e tij”, tha Watzke, i cili i ofron ikonës së klubit një vend në të ardhmen. “Ne shpresojmë shumë se ai do të kthehet te BVB pas karrierës së tij profesionale, sepse ka shumë detyra që e presin këtu në Dortmund”.

Gjatë periudhës së tij me Dortmund-in, Reus numëron 424 paraqitje, 168 gola dhe 128 asistime. Ai ka fituar dy Kupa të Gjermanisë dhe tre Superkupa të Gjermanisë.

Në aspektin personal, Reus është shpallur dy herë “Lojtari më i Mirë Gjerman i Vitit” dhe tre herë “Lojtari i Vitit në Bundesliga”.

Reus ishte i destinuar për të qenë një nga lojtarët më të shquar gjermanë në historinë e futbollit, por dëmtimet e shpeshta penguan karrierën e tij të ishte më e lavdishme se ajo aktuale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.