Gërvalla sugjeron ndërkombëtarët ta ndërrojnë strategjinë: Serbia paraqet rrezik për rajonin dhe paqen në Evropë

Ministrja e Punëve të Jashtme dhe Diasporës, Donika Gërvalla-Schwarz, në një tryzë diskutimi të organizuar nga Instituti “Hudson” në Uashington, theksoi se Serbia është kthyer përsëri në një kërcënim të vërtetë jo vetëm për Kosovën dhe Bosnjë-Hercegovinën, por për të gjithë fqinjët rajonalë, derisa sugjeroi ndërkombëtarët ta ndërrojnë strategjinë ndaj shtetit serb.

“…duke potencuar rëndësinë e ndërrimit të strategjisë së demokracive perëndimore në raport me Serbinë si kundërshtaren më të fuqishme të vlerave perëndimore dhe demokratike në Evropë dhe domosdoshmërinë e konfrontimit të Serbisë me rrezikun që paraqet për rajonin por edhe për paqen në Evropë”, shkroi kryediplomatja në “Facebook” të dielen pasdite.

Duke përshkruar “zhvillimin e jashtëzakonshëm” të Kosovës, por edhe të forcimit të të gjitha strukturave të sigurisë dhe forcave të armatosura të vendit, shefja e diplomacisë kosovare përsëriti përkushtimin e vazhdueshëm të Kosovës për vlerat demokratike dhe vullnetin e palëkundur për anëtarësim në Aleancën e Atlantikut të Veriut (NATO) dhe Bashkimin Evropian (BE).

Gjatë qëndrimit në Shtetet e Bashkuara të Amerikës (SHBA), ministrja Gërvalla takoi disa kongresistë amerikanë, por edhe zyrtarë të lartë, përfshirë Ndihmës Sekretarin e Shtetit për Evropë dhe Euroazi, James O’Brien, ku në fokus të diskutimeve ka qenë edhe anëtarësimi i Kosovës në organizata ndërkombëtare, përveç zhvillimeve të tjera aktuale në vend dhe rajon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.