Mirlind Daku shpërthen në lot për grumbullimin në Euro 2024 dhe poston mesazhin e veçantë: Jam djalë nga Kosova, më ka thirr Atdheu

Sulmuesi i Kombëtares shqiptare të futbollit, Mirlind, Daku, ka shpërthyer në lot kur ka mësuar se tekniku shqiptar Sylvinho, e ka thirrur atë si pjesë e ekipit që do të përfaqësojë ngjyrat kuqezi në Euro 2024.

Në një video të publikuar nga gazetari sportiv në Kosovë, Arlind Sadiku, shfaqet Daku së bashku me familjarët, teksa presin publikimin e listës së Sylvinhos, e cila u bë zyrtar rreth orës 16:00 të 27 majit.

Me t’u shfaqur fotoja e Dakut në videon ku po publikohej lista e thirrjes, familjarët dhe Daku vetë shpërthyen në lot gëzimi.

26-vjeçari, i cili aktivizohet te Rubin Kazani në Rusi në rolin e sulmuesit, ka realizuar 28 ndeshje këtë sezon, duke shënuar 10 gola dhe duke asistuar katër herë.

Po ashtu, ai ka qenë ndër lojtarët që zunë vend në ekipin kombëtar gjatë kualifikueseve, ku edhe ka shënuar një gol me rëndësi dhe ka asistuar gjithashtu.

Më tej, Daku ka publikuar edhe vetë një postim në median e tij sociale Facebook, ku shfaqet në oborrin e shtëpisë me një mesazh të veçantë, të cilin e ka shpalosur edhe më herët, për krenarinë që ai ndjen duke qenë pjesë e kombëtares: Jam djalë nga Kosova, më ka thirr Atdheu.

Të shohim tashmë se si Daku dhe të tjerët do të paraqiten në ngjarjen e madhe futbollistike kontinentale, ndoshta më të rëndësishmen në karrierën e tyre deri tani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.