Macron godet nacionalistët evropianë: Po shesin të njëjtat gënjeshtra si ato për Brexit-in

Presidenti francez, Emmanuel Macron, i ka përshkruar nacionalistët evropianë si “Brexit-ë të fshehur” që i shesin publikut “të njëjtat gënjeshtra” si ata që bënë fushatë për daljen e Britanisë së Madhe nga Bashkimi Evropian.

Macron ka thënë në një intervistë se mënyra e vetme për të ndaluar ngritjen e nacionalizmit është “të jesh mjaft i guximshëm për të mos menduar se ngritja e tyre është e pashmangshme”.

Po ashtu ai ka përsëritur se nuk përjashton dërgimin e trupave franceze në Ukrainë nëse Rusia thyen vijën e frontit dhe Kievi kërkon ushtarë.

Javën e kaluar, ai ka deklaruar se Evropa “mund të vdiste” pjesërisht për shkak të kërcënimit ekzistencial të paraqitur nga agresioni rus pas pushtimit të Ukrainës nga Moska në shkurt 2022.

Këtë, javë përpara zgjedhjeve evropiane, në të cilat Partia e ekstremit të djathtë Rassemblement National (RN) pritet të fitojë me një shumicë dërrmuese kundër partisë qendrore të Rilindjes së Macron.

Në të gjithë bllokun prej 27 anëtarësh, shumica e sondazheve parashikojnë fitimet më të mëdha për grupin e ekstremit të djathtë Identiteti dhe Demokracia (ID) në parlamentin evropian, i cili përfshin Alternativën për Gjermaninë (AfD) të Gjermanisë dhe Lega të Italisë.

“Ajo që më vret mua, si në Francë ashtu edhe në Evropë, është shpirti i humbjes. Fryma e humbjes do të thotë dy gjëra: mësohesh me të dhe ndalon së luftuari”, ka thënë Macron.

“E dyta është “pointizmi” frikacak. Njerëzit shikojnë sondazhet, por sondazhet nuk bëjnë politikë. Është aftësia juaj për të kryer gjërat. Dhe kështu të gjithë thonë se nacionalizmi është në rritje. Natyrisht, kjo është më e thjeshtë. Por nacionalistët po shtrembërojnë debatin evropian”.

Sipas tij, “Brexit e ka varfëruar Mbretërinë e Bashkuar.

“Brexit nuk ka bërë asgjë për të zgjidhur emigracionin në Mbretëri të Bashkuar. Epo, pavarësisht kësaj, disa njerëz mendojnë se nuk duket aq keq, por askush nuk guxon të thotë se diçka nuk është në rregull. Dhe kështu askush nuk merr përgjegjësi për asgjë”.

Për Ukrainën, presidenti francez – i cili në shkurt bëri bujë kur për herë të parë refuzoi të përjashtonte dërgimin e trupave tokësore – ka thënë përsëri se ai “nuk po përjashtonte asgjë sepse ne po përballemi me dikë që nuk po përjashton asgjë” dhe përshkroi Rusinë si |një fuqi e destabilizimit rajonal, një kërcënim për sigurinë evropiane”.

Për Macron, çështja e dërgimit të trupave franceze në Ukrainë do të lindte “në mënyrë legjitime” nëse Rusia thyente linjat e Ukrainës.

“Unë kam një objektiv të qartë strategjik: Rusia nuk mund të fitojë në Ukrainë. Nëse Rusia fiton në Ukrainë, nuk do të ketë siguri në Evropë”, ka shtuar ai.

“Kush mund të pretendojë se Rusia do të ndalet atje? Çfarë sigurie do të ketë për vendet e tjera fqinje, Moldavinë, Rumaninë, Poloninë, Lituaninë dhe të tjerat?”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.