Tifozët e Fenerbahce-s kënduan Putinin, pritet dënim i madh për klubin turk

Tifozët e klubit turk, Fenerbahce, bënë një gjest të turpshëm në ndeshjen e mbrëmshme që skuadra e tyre u eliminua nga Liga e Kampionëve përballë ukrainasve të Dinamo Kievit.

Ata kënduan dhe brohoritën emrin e presidentit të Rusisë, Vladimir Putin, në momentin kur skuadra e tyre ishte duke humbur nga ukrainasit.

I gjithë stadiumi u ngrit në këmbë për të kënduar emrin e Putinit në momentin që Dinamo shënoi gol ndaj Fenerbahce-s.

Fenerbahçe fans chanting “Vladimir Putin” after a Dynamo Kyiv player celebrated scoring in this #UCL qualifier.

Absolutely tasteless 👎 pic.twitter.com/NocU0MTpbk

— Nico Cantor (@Nicocantor1) July 27, 2022

Pas këtij gjesti të shëmtuar të tifozëve, pritet që ekipi turk ta marrë një dënim të majmë nga UEFA.

Këtë e paralajmëroi edhe gazetari turk, Ahmet Çakar, i cili tha se klubi i Fenerbahce-s do ta pësojë keq nga UEFA.

“Bordi Ekzekutiv i UEFA-s u mblodh me telekonferencë me kodin e urgjencës. Ata u takuan me vëzhguesin dhe përfaqësuesin e ndeshjes. Brohoritja e Putinit do të shkaktojë telashe të mëdha, pritet një dënim i madh për klubin turk”, tha Çakar.

Sa i përket takimit, Fenerbahce u eliminua nga Dinamo, pasi që ndeshja në Stamboll përfundoi me rezultat 1:2 (pas kohës shtesë) në favor të ukrainasve, derisa takimi i parë kishte përfunduar 0:0.

Kujtojmë që pas nisjes së luftës në Ukrainë nga Rusia në shkurt të këtij viti, UEFA ka përjashtuar të gjitha ekipet e Rusisë dhe kombëtaren ruse nga garat e saj.

Gjithashtu Rusia dhe sportistët rusë janë përjashtuar nga të gjitha sportet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.