Territori i trazuar – historiku i ndërhyrjeve të policisë në Veri të Kosovës

Aksioni i ditës së hënë i Njësisë Speciale të Policisë së Kosovës për vendosjen e masave të reciprocitetit për tabelat “RKS”, nuk është aksioni i parë i këtij institucioni në veri të Mitrovicës.

Përveç ndërhyrjes për vendosjen e reciprocitetit, Policia e Kosovës në Mitrovicën e Veriut kishte zhvilluar edhe aksion për të marrë nën kontroll pikat kufitare në veri të vendit 10 vjet më parë.

Institucione e Kosovës kishin zhvilluar intervenime edhe për të arrestuar njerëz të krimit dhe zyrtarë të lartë shtetërorë nga Serbia në veri të vendit.

Trazirat e Marsit 2004

Kosova, me 17 mars të vitit 2004 u gjend në prag të një përplasje të re si rrjedhojë e protestave dyditore që u organizuan në veri të vendit pas njoftimeve se në Ibër ishin mbytur dy fëmijë raportimet e para ishin se ata u ndoqën nga disa serbë dhe përfunduan në lum.

Gjatë protestave që më vonë do të njiheshin si “Trazirat e Marsit”, u vranë 19 civilë, nga të cilët 11 shqiptarë dhe 8 serbë, ndërsa u lënduan mbi 900 persona, kryesisht shqiptarë.

Si pasojë e trazirave u dogjën disa shtëpi dhe kisha serbe. Ngjarje të ngjashme ndodhen me shtëpitë shqiptare në pjesët me shumicë serbe. Serbët u hakmorën edhe me djegien e disa xhamive në Serbi.

Me këto trazira u arrit të kuptohet se gjendja në Kosovë nuk mund të përmirësohet pa zgjidhjen e statusit përfundimtar.

Kështu, sekretari gjeneral i Kombeve të Bashkuara, Kofi Annan, i dha detyrën norvegjezit, Kai Eide, për hartimin e një raporti që do të pasqyronte situatën në Kosovë

Në tetor 2005, Eide dorëzoi raportin në të cilën rekomandohej se ka ardhur koha për fillimin e bisedimeve për statusin përfundimtarë të Kosovës.

Aksioni i Parë i Njësisë Speciale të Policisë së Kosovës

Pikat kufitare të Kosovës deri para shpalljes së pavarësisë së vendit kontrolloheshin nga misioni i përkohshëm i Kombeve të Bashkuara në Kosovë apo siç njihet ndryshe “UNMIK”.

Por 17 shkurti i vitit 2008, bëri që mandati i kontrollimit të kufijve shtetërorë të Kosovës të kalojë nga misioni UNMIK-ut në institucionet e Republikës së Kosovës.

Mirëpo, kontrollin në pikat kufitare në veri të vendit, Kosova si shtet i pavarur nuk kishte arritur ta shtrijë.

Se gjendja në veri të Kosovës nuk është në nivelin e duhur ishte konfirmuar edhe në takimin në mes të ish-komandantit të KFOR-it, Giuseppe Emilion Gay dhe ish-Kryeministrit të Kosovës Hashim Thaçi.

“Në veri ka probleme, ka korrupsion dhe krim të organizuar, por, besojmë se shumë shpejtë gjendja në veri do të përmirësohet “, ishte deklaruar Thaçi.

Shkëndijën e parë për nisjen e një aksioni për vënien në kontroll të pikave kufitare në veri të vendit kishte dhënë ish-ambasadori i Shteteve të Bashkuara të Amerikës, Christopher Dell, i cili kishte thënë se Kosova duhet t’i kontrollojë pikat kufitare të territorit të saj.

Në këto rrethana kishte filluar edhe aksioni i parë i njësisë Speciale të Policisë së Kosovës të njohur si “ROSU”, në veri të Mitrovicës, i cili datonte me 25 korrik të vitit 2011, ku në atë kohë Qeveria e Kosovës pati marrë vendim të ndërhyjë në veri të vendit për të marrë nën kontroll pikat kufitare në Jarinjë dhe Bërnjakë, të cilat deri në atë kohë kontrolloheshin nga strukturat paralele serbe.

Ndërhyrja në fjalë ishte konsideruar si përpjekje e parë serioze për shtrirjen e sovranitetit në tërë territorin e Kosovës.

Në aksionin e 10 viteve më parë kishte humbur jetën Enver Zymberi, njëri nga policët e njësitit ROSU, pasi në të dhe pjesëtarët e tjerë kishin shtënë me armë zjarri grupe të armatosura nga pjesa veriore.

Kryeministri i Kosovës në atë kohë, Hashim Thaçi, këtë aksion të Policisë së Kosovës e kishte konsideruar si “shuarjen e ëndrrës së Serbisë për ndarjen e Kosovës dhe se kjo ditë është ditë e bashkimit territorial të Kosovës”.

Arrestimi i zyrtarit serb, Marko Gjuriç

Ndërhyrja e Policisë së Kosovës në veri të vendit kishte ndodhur edhe në mars të vitit 2018, kur ishte arrestuar shefi i të ashtuquajturës Zyra për Kosovën në Qeverinë serbe, Marko Gjuriç, i cili në atë kohë nuk kishte leje zyrtare për të hyrë në territorin e Republikë së Kosovës.

I gjithë operacioni kishte nisur me vendosjen e autoblindave të Policisë në stacionin policor të Mitrovicës së Jugut, në pritje të urdhrit për t’u nisur drejt veriut.

Shefi i diplomacisë kosovare, në atë kohë Behgjet Pacolli, kishte thënë se arsyeja pse përfaqësuesve të Qeverisë serbe, Aleksandar Vulin dhe Marko Gjuriq, u është ndaluar hyrja në Kosovës ishte për shkak të nxitjes së urrejtjes.

Arrestimi i Gjuriç, kishte ndodhur në vendin ku organizohej një tubim me qytetarët në Mitrovicën e Veriut.

Gjatë arrestimit të tij, Policia kishte përdorur edhe shok bombat.

Pas arrestimit, ai nën përcjelljen e autoblindave të Policisë së Kosovës, ishte nisur drejt stacionit të Policisë në Prishtinë.

Pasi ishte marrë në pyetje, institucionet e Kosovës kishin vendosur ta depërtojnë përfaqësuesin serb përmes pikës kufitare të Merdares.

Ish-Presidenti i Kosovës, Hashim Thaçi, kishte bërë thirrje për qetësi, derisa ka thënë se Policia e Kosovës ka vepruar në përputhje me ligjet dhe kompetencat e veta në arrestimin e Marko Gjuriçit.

“Marko Gjuriç ka hyrë në Kosovë në mënyrë të paligjshme. Policia e Kosovës ka vepruar në përputhje me kompetencat e veta, me profesionalizëm dhe në mbrojtje të rendit dhe ligjit në Kosovë”, është shprehur presidenti Thaçi.

Aksioni për arrestimin e të dyshuarve për vrasjen e liderit serb Ivanoviç

23 nëntori i vitit 2018 kishte shënuar aksionin e radhës të Njësisë Speciale të Policisë së Kosovës, në Mitrovicën e Veriut ku ishin arrestuar katër persona në lidhje me vrasjen e liderit serb Oliver Ivanoviç, i cili ishte vrarë me 16 janar të vitit 2018 para zyrës së tij në qytetin e Mitrovicës.

Aksioni në fjalë ishte realizuar në katër lokacione të ndryshme.

Gjatë aksionit policor ishin arrestuar, Dragisha Markoviq, pjesëtar i Policisë së Kosovës, i cili ka qenë i angazhuar rreth hetimit të vrasjes së Oliver Ivanoviçit. Po ashtu ishin arrestuar edhe Sasha Gjuriç, Marko Rashiç, si dhe Nedelko Spasojeviç.

Markoviç e Spasojeviç ishin pjesëtarë të Policisë së Kosovës.

Policia e Kosovës gjatë kontrollit, po ashtu, kishte sekuestruar edhe disa dëshmi relevante që ndërlidhen me rastin, dëshmi këto të cilat sipas policisë do të procedohen sipas procedurës ligjore.

Gjatë kohës së aksionit të policisë, në veri të Mitrovicës, të banuar me shumicë serbe, ishte lëshuar edhe alarmi që paralajmëronte rrezikun e përgjithshëm.

Për aksionin në veri reagim ka pasur edhe nga ish-kryeministri i Kosovës, Ramush Haradinaj, i cili pati  thënë se ky veprim policor nuk ndërlidhet me asnjë zhvillim politik dhe se “shteti i Kosovës dhe organet e tij të rendit, në asnjë mënyrë dhe asnjëherë nuk do të orientohet kundër asnjë grupi etnik apo politik”.

Arrestimi i zyrtarëve doganorë në veri të vendit

Ndër aksionet e fundit të Policisë së Kosovës në Veri të Mitrovicës, kishte ndodhur në vitin 2019, ku ishin arrestuar zyrtarë doganorë, zyrtarë të policisë dhe qytetarë që dyshohet të jenë të përfshirë në vepra të ndryshme kriminale.

“Në mesin e të arrestuarve ishte edhe një qytetarë rus i cili është kamufluar në petkun e diplomatit për të penguar policinë në aksionin e tyre”.

Këtë e kishte bërë të ditur ish-presidenti i Kosovës, Hashim Thaçi duke shtuar ky aksion nuk është kundër serbëve në Kosovë, por kundër grupeve kriminale.

Gjatë ndërhyrjes në veri ishin plagosur katër policë, ku zëdhënësja e Spitalit të Mitrovicës, Nita Mustafa kishte treguar gjendjen e tyre.

“Janë katër policë të plagosur, tre prej tyre janë duke u trajtuar në Emergjencë dhe njëri në Kirurgji, gjendja e tyre është stabile dhe jashtë rrezikut për jetë”.

policia e Kosovës gjatë aksionit përveç se kishte hasur në rezistencë të armatosur, kishte hasur edhe në disa bllokada të rrugëve, të cilat kanë penguar qarkullimin e mjeteve zyrtare, me ç’rast zyrtarët policor ishin detyruar të përdorin mjetet e nevojshme për lirimin e rrugëve me qëllim të vazhdimit të operacionit policor.

Ish-kryeministri i Kosovës, Ramush Haradinaj, kishte folur për qëllimin e aksionit në fjalë duke thënë se operacioni policor në veri ka në shënjestër individë të përfshirë në kontrabandë, krim të organizuar dhe aktivitete të tjera kriminale.

“Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë”, ishte shprehur Haradinaj.

Njësia Speciale me aksion për reciprocitet në Veri të Kosovës

Në orët e hershme të mëngjesit të së hënës, Policia e Kosovës, konkretisht Njësia Speciale Operative është vendosur në pikë kalimin e vjetër kufitar në mes të Kosovës dhe Serbisë, në Jarinje të komunës së Leposaviçit, për të filluar reciprocitetin e targave.

Të gjitha veturat që deri më tani kanë pasur targa të Serbisë, duhet t’i zëvendësojnë ato me “RKS”, targa të Republikës së Kosovës”, nëse duan të qarkullojnë brenda vendit.

Aksioni i Policisë së Kosovën ka ngritur reagime të shumta si nga shtetasit serb të cilët jetojnë në Kosovës ashtu edhe nga politikanët serbë të cilët veprojnë në këtë vend.

 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com