Asociacioni kusht për KiE, Molliqaj: Kurti veten e ka mbështetur për muri, Kosova s’duhet të paguajë për gabimet e tij

Kryetari i Partisë Social-Demokrate (PSD), Daradan Molliqaj, ka thënë se lufta e tyre do të jetë shumë fish më e ashpër ndaj çdo kujt që tenton të bëjë hapa drejt themelimit të Asociacionit të Komunave me Shumicë Serbe.

Këto komente, Molliqaj i ka bërë përmes një shkrimi në Facebook, të titulluar: “Më pak se dy javë na ndajnë nga hyrja e Kosovës në Këshillin Evropian apo pezullimit të hyrjes”, duke iu referuar kushtëzimit që i është vënë Kosovës për anëtarësim të plotë në këtë organizatë me progresin drejt themelimit të Asociacionit.

“Na duhet të theksojmë edhe një herë që ekskursioni aventuresk i Kurtit në Ohër para rreth një viti e ka sjellë Kosovën buzë humnerës dhe Asociacionin në agim të realitetit”, tha fillimisht Molliqaj.

Kushtëzimi ndërkombëtar, theksoi ai, “të cilin Kurti e ka provokuar e nxitur, sot është i qartë: tak Asociacioni, tak anëtarësimi në Këshillin Evropian”.

“Si sot, si nesër për cilëndo çështje tjetër, qoftë me e madhe se Këshilli Evropian apo edhe më e vogël, kushtëzim do mbetet Asociacioni, hyri apo nuk hyri Kosova në Këshillin Evropian”.

Por, për kreun e PSD-së, në cilindo rast, “qofshim pak apo shumë, lufta jonë ndaj Asociacionit do të jetë për një shumëfish më e ashpër se deri tani, nëse kushdo, haptas apo tinzërisht e bën një hap drejt realizimit të Asociacionit e shkatërrimit të Republikës tonë”.

“Kurti veten e ka mbështetur për muri e Kosova nuk duhet të paguajë me kokën e saj për gabimet e tij. Në duart e Gjykatës Kushtetuese është të mos e lejojë një gjë të tillë, për këtë vazhdojmë t’i bëjmë thirrje, siç e kemi bërë deri tani, që të i përmbahen kushtetutës tonë e mos të lejojë një ‘quasi’ autonomi kanceruoze në shtetin tonë”, shtoi.

Në fund të fundit, Molliqaj nënvizoi se “i tërë pushteti i takon popullit”.

“Sovrani përpjekjes më të vogël për të cenuar funksionalitetin e republikës do i përgjigjet asaj e atyre siç e meritojnë, me fuqinë që jo pak herë e ka dëshmuar”.

Për këtë, sipas Molliqajt, “i duhet vetëm një shkëndi dhe pak frymë”.

“Prandaj, mos tentoni të bëni shkëndi, sepse fryma jemi ne!”.

Ndryshe, Gjermania dhe Franca kanë kërkuar që Kosova të bëjë një hap substancial në raport me Asociacionin – të paktën dërgimin e draft-statutit të këtij mekanizmi në Kushtetuese për shqyrtim –  kur në pyetje është anëtarësimi i Kosovës në Këshillin e Evropës.

Kancelari Gjermani, Olaf Scholz, në një bisedë telefonike të hënën me kryeministrin e Kosovës, Albin Kurti, ka kërkuar nga ky i fundit hapa konkretë drejtë themelimit të Asociacionit të Komunave me Shumicë Serbe, kur në pyetje është anëtarësimi i Kosovës në Këshillin e Evropës.

“Kancelari përshëndeti zbatimin e vendimit të Gjykatës Kushtetuese të Kosovës për Manastirin e Deçanit. Ai nënvizoi rëndësinë e hapave konkretë drejt themelimit të Asociacionit të Komunave me Shumicë Serbe nga autoritetet e Kosovës, edhe në kuadër të aplikimit të Kosovës për anëtarësim në Këshillin e Evropës”, thuhet në njoftimin e Kancelarisë Gjermane.

Dy javë më parë Kurti zhvilloi një bisedë telefonike edhe me presidentin e Francës, Emmanuel Macron.

Macron gjatë bisedës ndërsa përshëndeti Kurtin për zbatimin e vendimit të Gjykatës Kushtetuese për Manastirin e Deçanit, nënvizoi rëndësinë që Franca i kushton zbatimit të Asociacionit, sidomos në kontekstin e anëtarësimit të Kosovës në Këshillin e Evropës.

“Presidenti i Republikës përshëndeti zbatimin e vendimit të Gjykatës Kushtetuese për Manastirin e Deçanit. Megjithatë, ai nënvizoi rëndësinë që Franca i kushton, edhe në kontekstin e aplikimit të Kosovës për anëtarësim në Këshillin e Evropës, progresit të shpejtë dhe të pakthyeshëm në zbatimin nga autoritetet kosovare të Asociacionit të Komunave me Shumicë Serbe”, thuhet në njoftimin e Pallatit Elysee.

Albanian Post, ditë më parë raportoi se Qeveria e Kosovës është pajtuar në parim me komunitetin ndërkombëtar që pas përkrahjes që ka marrë me 16 prill nga Asambleja Parlamentare e Këshillit të Evropës për anëtarësimin e Kosovës në këtë organizatë, të dërgojë deri më 10 maj për shqyrtim në Gjykatën Kushtetuese draft-statutin për Asociacionin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.