Tahiri: Amerika të ndërtojë bazë ushtarake në Veri të Kosovës

“Amerika të ndërtojë bazë ushtarake në Veri të Kosovës, vetëm në këtë mënyrë ndalet lufta gjeopolitike e Serbisë dhe Rusisë ndaj Kosovës dhe Ballkanit”, ka thënë kryenegociatorja e Kosovës në dialogun me Serbinë, Edita Tahiri.

Këto komente Tahiri i bëri përmes një postimi në Facebook, pas sulmit terrorist ndaj Policisë së Kosovës në Banjskë të Zveçanit dhe pas dislokimit të trupave ushtarake serbe përgjatë kufirit me Kosovën.

“Si rezultat vija gjeopolitike perëndim-lindje vendoset drejt në Ballkan. Përcaktimi perëndimor i Kosovës dhe shteteve tjera që linden nga zhbërja e ish-Jugosllavisë u pagua me jetë njerëzish”, shkroi.

Kjo kërkesë e Tahirit vjen pas sulmit terrorist ndaj Policisë së Kosovës me 24 shtator, ku një polic mbeti vrarë.

Nga ana tjetër Serbia, jo vetëm që nuk e dënoi sulmin terrorist, por shpalli ditë zie kombëtare për t’i nderuar kështu terroristët e vrarë.

Përveç kësaj, shteti serb dislokoi një numër të madh të trupave ushtarake përgjatë kufirit me Kosovën.

Nga ana tjetër, vendet perëndimore, përfshirë Shtetet e Bashkuara të Amerikës dhe Bashkimin Evropian, e kanë dënuar sulmin terrorist, teksa kanë kërkuar që urgjentisht Beogradi zyrtar të zvogëlojë trupat ushtarake nga kufiri me Kosovën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.