Sot, 70 vjet nga Traktati i Parisit

70 vjet kanë kaluar nga nënshkrimi i Traktatit të Parisit, më 18 prill 1951.

Kjo marrëveshje njihet si “traktati që sanksionoi krijimin e Komuniteteve Evropiane të Qymyrit dhe Çelikut (KEQÇ)”.

Nëpërmjet tij, gjashtë vendet nënshkruese (Belgjika, Franca, Holanda, Italia, Luksemburgu dhe Republika Federale e Gjermanisë), angazhohen të vendosin bashkëpunimin ndërkombëtar mbi baza krejtësisht të reja.

Ditën e diel, më 18 prill, presidentja e Komisionit Evropian, Ursula von der Leyen, ka përkujtuar këtë 70-vjetor.

Me anë të një postimi në Twitter, ajo u shpreh se ky traktat është baza e bashkëpunimit midis kombeve që dikur ishin armike.

“E ringjallur nga rrënojat e luftës, Evropa filloi rrugëtimin e saj drejt Bashkimit të sotëm”.

Oggi celebriamo i 70 anni dalla firma del Trattato di Parigi che istituiva la Comunità Europea del Carbone e dell’Acciaio, la base della cooperazione economica tra nazioni un tempo nemiche.

Risorta dalle rovine della guerra, l'Europa iniziava il cammino verso l'Unione odierna. pic.twitter.com/PppVLSNRQV

— Ursula von der Leyen (@vonderleyen) April 18, 2021

Gjithashtu, edhe presidenti i Francës, Emmanuel Macron, ka reaguar në Twitter, duke u shprehur kështu për 70-vjetorin e Traktatit për Komunitetin Evropian të Qymyrit dhe Çelikut:

“70 vjet më parë, në Paris, 6 vende bënë zgjedhjen e paqes dhe bashkëpunimit, duke nënshkruar Traktatin për Komunitetin Evropian të Qymyrit dhe Çelikut. Ata hodhën bazat për Bashkimin tonë Evropian. Ne jemi garantuesit e këtij akti themelues”.

Il y a 70 ans, à Paris, 6 pays faisaient le choix de la paix et de la coopération en signant le traité sur la Communauté européenne du charbon et de l’acier. Ils posaient les premiers jalons de notre Union européenne. Nous sommes les garants de cet acte fondateur. pic.twitter.com/Wh1SdCShGl

— Emmanuel Macron (@EmmanuelMacron) April 18, 2021

Marrëveshja ndërmjet vendeve kishte synim krijimin e një Tregu të Përbashkët të Qymyrit dhe Çelikut. Kjo do të arrihej nëpërmjet vendosjes së prodhimit të tyre nën një pushtet mbikombëtar, i cili ishte Autoriteti i Lartë i përbashkët franko-gjerman i hapur ndaj pjesëmarrjes së vendeve të tjera të Europës.

Qëllimi qe hedhja e bazave të përbashkëta të zhvillimit ekonomik, si faza e parë e federatës evropiane. Për të ndryshuar kështu fatin e këtyre vendeve, të cilat për shumë kohë i ishin drejtuar industrisë së prodhimit të armëve.

Krijimi i tregut të përbashkët të qymyrit dhe çelikut presupozonte heqjen e tarifave doganore dhe të kufizimeve sasiore në qarkullimin e lirë të mallrave, heqjen e masave diskriminuese, si dhe subvencionimet e ndihmat shtetërore.

Ai dominohej nga parimi i konkurrencës së lirë, por ndërkohë Komuniteti kontrollonte furnizimin e tij të rregullt dhe përcaktimin e çmimeve në nivelin më të ulët.

Krijimi i KEQÇ-së ndikoi pozitivisht në intensifikimin e këmbimeve, modernizimin e prodhimit, rënien e mungesës së qymyrit në treg, dyfishimin e prodhimit të çelikut, stabilizimin e furnizimit të tregut me produkte çeliku.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.