Senatori Menendez: S’ka ende garanci se Asociacioni s’do bëhet si Republika Serbe – Vuçiç po promovon idenë e “Serbisë së Madhe”

Kryetari i Komisionit për Punë të Jashtme në Senatin e Shteteve të Bashkuara të Amerikës, Bob Menendez, tha të enjten se përderisa presioni i Perëndimit është orientuar kryesisht nga Kosova në lidhje me Asociacionin e Komunave me Shumicë Serbe, presidenti i Serbisë, Aleksandër Vuçiç, po promovon idenë nacionaliste të “botës serbe”.

“Vuçiç bëri një fjalim publik ku shprehu papajtueshmërinë e tij me përmbajtjen e marrëveshjes. Ky është një model i Vuçiç-it. Ky është një model i njohur i Vuçiç-it. Diçka tjetër thotë para liderëve perëndimorë, ndërsa diçka tjetër para popullit serb dhe mediave që kontrollohen nga ai”.

“Ai përdorë narrativën nacionaliste serbe për të përhapur idenë apo vizionin e ‘Serbisë së Madhe’, njëjtë sikur vizioni i ‘Rusisë së Madhe’ të [Vladimir] Putin-it. Ai lavdërohet me lidhjet që ka me Putin-in. Nuk i ka vendosur ende sanksione Rusisë”, tha Menendez.

Menendez pohoi se Kosovës po i bëhet presion për themelimin e Asociacionit e Komunave me Shumicë Serbe nga liderët perëndimorë, ndonëse ajo është pajtuar për këtë çështje dhe për më tepër, sipas tij, akoma nuk ka ende ndonjë plan apo garacion që ky mekanizëm nuk do të shndërrohet në nivel të tretë i pushtetit.

“Unë e shoh se po i bëhet presion Kosovës. E di se Kosova veçse është pajtuar për këtë. Nuk po i bëhet aspak presion Beogradit dhe ende s’ka ndonjë plan apo garanci se  asociacioni nuk do të bëhet një tjetër Republikë Serbe në Ballkanin Perëndimor sepse po i shohim implikimet në Bosnje-Hercegovinë”, shtoi ai.

Këshilltari i lartë në Departamentin amerikan të Shtetit, Derek Chollet dhe Emisari Special i SHBA-ve për Ballkanin Perëndimor, Gabriel Escobar, po marrin pjesë në seancën dëgjimore të Komisionit për Marrëdhënie me Jashtë mbi “Vlerësimin e politikës së SHBA-së për Ballkanin Perëndimor”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.