Nisma Socialdemokrate kërkon që opozita të thërras seancë për shkarkimin e Qeverisë: Krasniqi zgjodhi të dakordohet me Kurtin

Partia Nisma Socialdemokrate, pas takimit që ka bërë kryeministri i Kosovës, Albin Kurti me kryetarin e Partisë Demokratike të Kosovës, Memli Krasniqi, të hënën ka bërë thirrje tek deputetët që të mos pranojnë të shkarkohen nga Qeveria, por të thërrasin seancë dhe ta shkarkojnë ekzekutivin.

“NISMA Socialdemokrate u bën thirrje deputetëve të të gjitha partive të mos pranojnë të shkarkohen nga qeveria por të thërrasin seancë dhe ta shkarkojnë qeverinë!”.

Kjo parti përmes një komunikate për media ka thënë se tash e një kohë të gjatë Kosovës i ka munguar “zëri opozitar”, prandaj sipas tyre kërkesa për bashkërendimin e opozitës “ka qenë natyrale”.

“Hezitimi për të qenë pjesë e një fronti të bashkuar tanimë po deshifrohet me nxitimin e Memli Krasniqit, i cili para koordinimit me opozitën zgjodhi të dakordohet me Albin Kurtin”, thuhet në komunikatë.

Nga ta është theksuar se opozita duhet të kenë qëllime të ngjashme.

“Në rrethanat aktuale, opozita duhet ta ketë vetëm një qëndrim të përbashkët, dorëheqjen e Albin Kurtit apo shkarkimin përmes mocionit, i cili do të rezultonte me shpërbërjen e Kuvendit dhe shkuarjen në zgjedhje!”.

Ndërkaq në rast se Kuvendi shpërndahet atëherë sipas Nismës Socialdemokrate, bartja e fajit bëhet nga Qeveria tek Kuvendi.

Duke shtuar se, “përgjegjës për degradim të tërësishëm të shtetit në të gjitha sferat e jetës është qeveria dhe jo Kuvendi”.

Aleanca për Ardhmërinë e Kosovës (AAK) dhe Lidhja Demokratike e Kosovës (LDK), kanë refuzuar ftesën e Kurtit për t’u takuar të hënën, i vetmi që ka pranuar ftesën e Kurtit ka qenë kryetari i PDK-së, Memli Krasniqi.

Nga këto dy parti është thënë se refuzimi është bërë për shkak se e kanë konsideruar “shumë të vonuar” ftesën e kryeministrit nën argumentin se pushteti e ka shuar frymën e bashkëpunimit.

Partitë politike veçse kanë nisur të mobilizohen për shkak të mundësisë së zgjedhjeve të reja pak para përfundimit të mandatit të qeverisë së drejtuar nga Lëvizja Vetëvendosje (LVV).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.