Rrjedhja e të dhënave të targave, Gonxhja: Nga pikëpamja e sigurisë dhe e të gjithë protokolleve, nuk ka asnjë lloj cedimi

“E them me siguri të plotë se nga pikëpamja e sigurisë dhe e të gjithë protokolleve, nga pikëpamja e administrimit të sigurisë të sistemit zyrtar që bashkadministrohet, që është në pronësi të AKSHI-t, nuk ka asnjë lloj cedimi”.

Ky ka qenë reagimi i drejtorit të Përgjithshëm të Shërbimeve të Transportit Rrugor, Blendi Gonxhja, i ftuar në një emision mëngjesin e 27 dhjetorit, për sa i përket rrjedhjes masive të informacioneve të targave të makinave të çdo shtetasi në Shqipëri.

Gonxhja shtoi se të dhënat e publikuara janë të mbi 13 institucioneve në varësi të DPSHTRR-së dhe kjo e fundit nuk ka asnjë lloj problemi në sistemin e saj apo në protokolle.

“Në raportet që unë kam, nuk ka asnjë lloj cedimi nga ana e sistemit apo protokolleve, aspekteve administrative. Kjo jo për të thënë se kjo është një gjë normale”, tha ndër të tjera ai.

Ishte data 24 dhjetor, kur pas një rrjedhjeje masive informacionesh personale të çdo shtetasi shqiptar, doli edhe një databaze për targat.

Numri i të dhënave të publikuara të targave ishte në mbi 530 mijë. Në to përmbahen me detaje, përtej targave, edhe marka e automjetit, modeli i tyre dhe ngjyra.

I menjëhershëm ka qenë reagimi nga DPSHTRR-ja, nga ku deklaruan se ka nisur “menjëherë” hulumtimi dhe kërkimi i mbështetjes nga kompania që mirëmban sistemin informatik.

Kjo kompani është e kontraktuar nga Agjencia Kombëtare e Shoqërisë së Informacionit (AKSHI).

Përmes një reagimi në median sociale Facebook, DPSHTRR-ja ka bërë të ditur se “kjo bazë të dhënash aksesohet nga shumë institucione, me nivele të ndryshme aksesi”.

Dhe, sipas tyre, u shërben edhe operatorëve ekonomikë shtetëror e privat.

Kjo ishte rrjedhja e tretë masive e informacioneve brenda tri ditëve në Shqipëri. Në dy ditët e para, të dhënat personale të publikuara ishin ato të pagave personale për dy muaj. Përkatësisht, janarin dhe prillin.

Bashkëngjitur me të dhënat e prillit, ishin edhe ato të numrave të telefonit për mbi 900 mijë qytetarë. Mbi pagat, numri i të prekurve shkon në rreth 690 mijë qytetarë.

Rrjedhja e targave ka ndodhur në një skenar të ngjashëm me atë të 23 dhjetorit, kur u publikuan pagat e muajit mars.

Prokuroria e Tiranës ka nisur zyrtarisht një hetim mbi të dhënat e publikuara dhe po analizon sesi mund të ketë ardhur rrjedhja e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.