Kryetari i Odës Ekonomike të Kosovës (OEK), Lulzim Rafuna në vend të tërheqjes së Trustit, ka kërkuar rritjen e pagave.
Pas rritjes së çmimeve në produktet esenciale, sipas tij, kjo do të duhej të bëhej për të zbutur krizën aktuale në Kosovë.
“Kish me qenë e rrugës së duhur ngritja e pagave, minimumi në vlerën e inflacionit në mënyrë që qytetarët ta ndiejnë më pak çështjen e inflacionit”, ka thënë Rafuna për agjencinë e lajmeve Ekonomia Online.
Ai konsideron se Trusti nuk duhet të preket, prandaj edhe duhet të gjenden forma të tjera që ndihmojnë qytetarët në këtë periudhë.
“E mira kishte me qenë që Trusti të mos preket. E mira kishte me qenë të gjinden forma tjera për t’u ndihmuar nëpërmjet paketave të ndryshme nga Qeveria e vendit”.
“Në mungesë të saj qytetarët janë të detyruar ta kërkojnë tërheqje e Trustit, që sa më pak të ndiejnë efektin e inflacionit”, sqaroi Rafuna.
Nisma për tërheqjen e Trustit është proceduar për në Kuvendin e Kosovës, të mërkurën.
Ky vendim është marrë në Komisionin për Buxhet i cili ka shqyrtuar në parim Projekligjin për plotësim dhe ndryshimin e Ligjit për Fondet pensionale të Kosovës, më të cilin është kërkuar tërheqja e 30% e kursimeve pensionale të qytetarëve.
Për të përcjellur projektligjin në Kuvend kanë votuar pro 4 deputetë, kundër kanë votuar 3, ndërsa 2 kanë abstenuar.
Në këtë mbledhje guvernatori i Bankës Qendror të Kosovës, Fehmi Mehmeti, ka thënë se qëllimi i kontributeve pensionale është që të ofrojë mirëqenie pas moshës së pensionimit.
“Për pensionet e bazuara në kursim, që veprojmë në emër të pjesëmarrësve dhe shpenzuesve, ka për qëllim grumbullimin dhe të sigurojë pensionet kontribuuese në rast se e arrijnë moshën 65 vjeçare. Qëllimi i kontributeve pensionale është që të ofrojë mirëqenie pas moshën së pensionimit”, ka theksuar Mehmeti.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com