Osmani: Njohja e pavarësisë nga pesë shtetet anëtare të BE-së, kontribut i paqes dhe stabilitetit

Presidentja e Kosovës, Vjosa Osmani ka pranuar “Raportin e Komisionit Evropian për Kosovën” nga shefi i Zyrës së Bashkimit Evropian në Kosovë, Tomas Szunyog.

Përmes një komunikate për media, bëhet e ditur se Osmani ka nënvizuar se Kosova ka prioritet anëtarësimin në Bashkimin Evropian.

“Gjatë takimit, Presidentja kërkoi sqarime për moskonsultimin e institucionit të Presidencës në fazën përpara para hartimit të raportit, siç janë konsultuar të gjitha institucionet e tjera dhe shoqëria civile. Ajo potencoi rëndësinë që raporti i ardhshëm të jetë gjithëpërfshirës dhe të reflektoj kontributin e Presidencës për arritjet gjatë periudhës raportuese”, thuhet në komunikatë.

Ndërsa, ka theksuar se rritja e reformave evropiane duhet të ndjekjet me diskutime dhe me institucionet dhe shtetet anëtare të BE-së.

“Presidentja Osmani ka vlerësuar se angazhimi në rritje i institucioneve të Kosovës për zbatimin e reformave evropiane duhet të përcillet me diskutime me institucionet dhe shtetet anëtare të BE-së për fillimin e procesit të negociatave për anëtarësim në BE”.

“Ajo potencoi se njohja e pavarësisë së Kosovës nga pesë shtetet anëtare të BE-së, është veprim jo vetëm i drejtë, por do të shërbejë si shtysë për realizimin e reformave të brendshme dhe do t’i kontribuoj paqes dhe stabilitetit në rajon”.

Po ashtu, sa i përket liberalizimit të vizave deklaroi se, “është qenësor për ruajtjen e kredibilitetit të BE-së në raport me zbatimin efektiv të politikës së zgjerimit të bazuar në meritat dhe rezultatet e angazhimeve të shteteve kandidate”.

Shefi i Zyrës së Bashkimit Evropian në Kosovë, Tomas Szunyog, në konferencë për media ka thënë se Kosova duhet të arrijë rezultate të prekshme në fushën e sundimit të ligjit, në luftën kundër korrupsionit, reforma në administratë e tjera.

Ndërsa, theksoi se duhet zbatuar gjitha marrëveshjet e kaluara të arritura në Bruksel, përfshirë edhe ajo për formimin e Asociacionit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.