Ngjarja vjetore e Alibaba-s shënon rritjen më të ngadaltë të shitjeve

Te gjiganti kinez i tregtisë elektronike, Alibaba, Dita e Beqarëve njihet si ekstravaganca më e madhe e blerjeve online në botë.

Mirëpo, këtë vit vrulli është zbutur pasi Pekini ka goditur bizneset dhe rritja ekonomike është ngadalësuar.

Agjencia e lajmeve, “BBC”, tregon se kësaj here, shitjet për ngjarjen 11-ditore u rritën me ritmin e tyre më të ngadaltë që kur është prezantuar në vitin 2009, me 8.5 për qind më shumë se vitin e kaluar.

Megjithatë, shpenzimet e klientëve kanë arritur një rekord të ri prej 540.3 miliardë juanë.

Viti shënon herën e parë që shitjet për Ditën e Beqarëve të Alibaba-s nuk arritën rritje dyshifrore nga viti në vit.

Rënia vjen në sfondin e lëvizjeve të qeverisë kineze në muajt e fundit për të vendosur rregulla të reja të ashpra ndaj gjigantëve të internetit në vend.

Pas viteve të mbikëqyrjes së kufizuar nga Pekini, zyrtarët kanë zbatuar rregullore për të siguruar që industria e teknologjisë të konkurrojë në mënyrë të drejtë dhe të kontribuojë më shumë.

Gjatë goditjes, Alibaba e gjeti veten në qendër të vëmendjes pasi pagoi një gjobë rekord prej 2.8 miliardë dollarësh. Kjo pasi një hetim përcaktoi se kishte abuzuar me pozicionin në treg për vite me radhë.

Gjithashtu kompania ka pohuar se do të ndryshojë mënyrën se si e zhvillon biznesin.

Një lloj tjetër ngjarjeje

Shen Lu nga faqja e teknologjisë Protocol, ka treguar për “BBC” se Dita e Beqarëve e këtij viti kishte të bënte me përmirësimin e imazhit të kompanisë.

“Alibaba po përpiqet të prezantohet si një kompani teknologjike me përgjegjësi sociale. Ata po tregojnë se janë në përputhje me rregulloret dhe përshtaten me atmosferën e përgjithshme politike”, ka thënë ajo.

Shen ka sugjeruar se ka shenja që blerësit po kërkojnë mënyra të reja për të blerë online.

“Tani kanë kaluar 12 vjet që kur Alibaba shpiku ngjarjen e blerjeve të Ditës së Beqarëve. Ishte një zhurmë e tillë vite më parë, por nuk është më emocionuese për blerësit në Kinë”, ka thënë ajo.

Ngadalësimi i rritjes

Konsumatorët mund të jenë të kujdesshëm për të bërë blerje të panevojshme pasi rimëkëmbja ekonomike e Kinës tregon shenja të humbjes.

Sipas shifrave zyrtare, ekonomia e dytë më e madhe në botë është rritur me 4.9 për qind në tremujorin korrik-shtator nga një vit më parë, shkruan “BBC”.

Ky ishte ritmi më i ngadaltë i zgjerimit në një vit dhe më i keq nga sa kishin parashikuar analistët.

Ai vjen pasi mungesat e energjisë, shpërthimet e reja të COVID-19 dhe shqetësimet për tregun e pronave në vend, rëndojnë mbi ekonominë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.