Kompania Netflix është në rrugën e duhur për të ofruar një “ritëm të qëndrueshëm” të programimit deri në fund të vitit 2022.
Kështu ka bërë me dije shefja e televizionit pas vonesave të prodhimit të shkaktuara nga pandemia COVID-19, shkruan e përditshmja “Financial Times”.
“Tani jemi në një ritëm të qëndrueshëm për dy vitet e ardhshme”, ka thënë Bela Bajaria, drejtuesja globale e televizionit në Netflix.
“Kjo nëse nuk ndodh diçka me pandeminë, por tani për tani, jemi në një gjendje të qëndrueshme gjatë gjithë vitit 2022 për sa i përket asaj që po dorëzohet. Të gjitha këto shfaqje janë në prodhim dhe përfundojnë xhirimet”, ka vijuar ajo.
Një seri e vazhdueshme e shfaqjeve dhe filmave të njohur televizivë ka rezultuar kritike për rritjen e pajtimtarëve në Netflix gjithashtu dhe në çmimin e aksioneve të tij.
“Financial Times” dallon se kompania pësoi një ngadalësim të mprehtë të shtimeve të pajtimtarëve në gjysmën e parë të vitit 2021, të cilën drejtuesit e kanë justifikuar me një ofertë më të ulët të përmbajtjes për shkak të vonesave të prodhimit.
Më parë, në kompani janë ngritur shqetësimet për një grevë të mundshme midis punonjësve të ekuipazhit të Hollywood-it, të cilët kanë thënë se nuk fitojnë një rrogë jetese, edhe pse kompanitë teknologjike korrin përfitimet e bumit të transmetimit.
Afro 60 mijë punëtorë në prapaskenë, të tillë si operatorët e kamerave dhe stilistët e flokëve, këtë javë votuan në favor të grevës, e cila do të ishte ndalesa e parë e tillë që nga viti 1945 dhe do të ndalonte prodhimin në të gjithë SHBA-të.
Mirëpo, Bajaria i ka hequr këto shqetësime dhe ka sqaruar se “duket që të gjithë janë vërtet të angazhuar nga të dy palët në gjetjen e një zgjidhjeje”.
Drejtuesit e Netflix-it kishin parashikuar që rritja të merrte vrull në gjysmën e dytë të këtij viti.
Kompania ka pasur suksese të kohëve të fundit me shfaqje të tilla si “Squid Game”, “The Witcher” dhe “Seinfeld”.
Këtë javë, Wall Street i ka dërguar aksionet e Netflix-it në një nivel të lartë të të gjitha kohërave, pasi investitorët parashikojnë një numër më të mirë të pajtimtarëve për shkak të ofrimit të programit më të fortë.
Lidhur me serialin “Squid Game”, ajo është bërë shfaqja më e njohur e Netflix-it në SHBA dhe shefi ekzekutiv, Ted Sarandos, ka thënë se mund të bëhet shfaqja më e madhe e të gjitha kohërave për kompaninë.
“Përherë e kemi ditur se ‘Squid Game’ do të ishte një titull i madh në Kore dhe Azinë Juglindore”, ka zbuluar Bajaria. Megjithatë, do të ishte “e vështirë të imagjinohet se çfarë u bë, sepse nuk e kishim parë kurrë më parë”.
Referuar “Financial Times”, rajoni i Azisë dhe Paqësorit përbënte dy të tretat e pajtimtarëve të rinj të Netflix-it në tremujorin e fundit, duke e bërë atë një rajon të rëndësishëm pasi regjistrimet në SHBA janë ndalur.
Nga ana tjetër, gjatë këtij viti, kompania do të shpenzojë 500 milionë dollarë për filma dhe shfaqje televizive në Korenë e Jugut.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
