Miftaraj: Ligji për Paga dhe ai për Zyrtarët Publikë cenojnë sigurinë juridike – opozita duhet t’i dërgoj në Kushtetuese

Sipas Drejtorit të Institutit i Kosovës për Drejtësi, Ehat Miftaraj, ligji për Paga ashtu edhe ligji për Zyrtarët Publikë në formën se si janë përpiluar cenojnë sigurinë juridike dhe financiare të institucioneve.

Miftaraj përmes një shkrimi në rrjetin social ‘Facebook’, ka kërkuar nga opozita që këto ligje të dërgohen në Gjykatën Kushtetuese.

“Dy ligjet në pjesë të caktuara cenojnë sigurinë juridike dhe financiare të institucioneve të pavarura, dhe çka është shumë shqetësuese administratën publike e kthejnë nga një shërbim civil në shërbim politik”, ka thënë Miftaraj.

“Partitë opozitare, institucionet e pavarura e kanë obligim ti dërgojnë këto dy ligje në Gjykatë Kushtetuese”.

Ai ka theksuar se vendimet e tilla duhet të merren edhe me pjesëmarrjen dhe bisedimet me publikun.

“Politikbërja dhe vendimmarrja duhet të bazohet në standardet minimale të pjesëmarrjes së publikut në konsultime publike të qytetarëve dhe grupeve të interesit”.

“Pjesëmarrja nuk konsiderohet se zbatohet në praktikë vetëm përmes dërgimit të komenteve dhe injorimit të tyre nga institucionet publike, pa përgjigje dhe arsyetim me shkrim pse nuk janë marr për bazë komentet”.

Edhe, Bashkimi Evropian ka shprehur shqetësimin për disa dispozita të Ligjit të ri për Zyrtarët Publikë dhe Ligjit për Pagat dhe njëkohësisht ka shprehur zhgënjimin që Kuvendi i Kosovës nuk i mori parasysh sugjerimet e tyre dhe ekipit të ekspertëve nga OECD/SIGMA.

“Ligji i ri për zyrtarët publikë është problematik në lidhje me sigurimin e një shërbimi civil të bazuar në merita që mund të menaxhojë efektivisht burimet njerëzore, pasi shton lirinë e tepruar në procedurat e rekrutimit, transferimit dhe disiplinës së nëpunësve civilë, duke e bërë shërbimin civil potencialisht të cënueshëm ndaj politizimit”, thuhet në reagimin e Zyrës së BE-së në Kosovë.

Qëllimi i komenteve dhe sugjerimeve të BE-së ishte udhëzimi dhe mbështeja për qeverinë rreth sigurimit të një një shërbimi civil të depolitizuar dhe profesional, me një sistem kompensimi transparent e të bazuar në merita.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.