Microsoft-i planifikon dyqanin e aplikacioneve për të rivalizuar Apple-in dhe Google-in

Kompania Microsoft po përgatitet të prezantojë një dyqan të ri aplikacionesh për lojëra në iPhone dhe telefona inteligjentë Android që nga viti i ardhshëm.

Kjo nëse blerja prej 75 miliardë dollarësh e Activision Blizzard qartësohet nga rregullatorët, sipas kreut të biznesit të kompanisë Xbox.

Referuar Aktit të Tregjeve Digjitale të BE-së, rregullat e reja që kërkojnë që Apple-i dhe Google-i të hapin platformat e tyre celulare për dyqanet e aplikacioneve në pronësi dhe operim të kompanive të tjera pritet të hyjnë në fuqi nga marsi 2024.

“Ne duam të jemi në gjendje të ofrojmë Xbox dhe përmbajtje si nga ne ashtu edhe nga partnerët tanë të palëve të treta në çdo ekran ku dikush do të dëshironte të luante”, ka thënë Phil Spencer, shefi ekzekutiv i Microsoft Gaming.

“Sot, ne nuk mund ta bëjmë këtë në pajisjet celulare, por ne duam të ndërtojmë një bote ku mendojmë se ato pajisje do të hapen”, ka shtuar ai.

Kompania Microsoft po lufton me rregullatorët në SHBA, Evropë dhe Mbretëri të Bashkuar, të cilët të gjithë kanë ngritur shqetësime për ndikimin e mundshëm në konkurrencë nga pronari i Xbox-it që blen zhvilluesin e Call of Duty, një nga ekskluzivitetet më të njohura të lojërave në botë.

Prodhuesi i PlayStation Sony ka qenë një kundërshtar i zëshëm i marrëveshjes.

Megjithatë, Spencer ka argumentuar se marrëveshja mund të nxiste konkurrencën në atë që ai e quan “platforma më e madhe ku njerëzit luajnë” – telefonat inteligjentë – ku Apple-i dhe Google-i operojnë atë që disa autoritete antitrust e kanë quajtur duopol mbi shpërndarjen e lojërave dhe aplikacioneve të tjera.

Teksa ka pranuar se është e vështirë të parashikohet saktësisht se kur Microsoft-i do të jetë në gjendje të hapë dyqanin e vet, Spencer ka thënë se do të ishte shumë e parëndësishme që kompania të përshtaste aplikacionet e saj Xbox dhe Game Pass për të shitur lojëra dhe abonime në pajisjet celulare.

Mungesa aktuale e lojërave celulare të Microsoft është një “boshllëk i dukshëm në aftësitë tona” që ka nevojë për Activision Blizzard për ta mbushur, ka vijuar ai.

Microsoft dhe Apple janë grindur për vite me radhë mbi mënyrën se si shërbimi i lojërave i bazuar në cloud i gjigantit të software-it, i cili është pjesë e Xbox Game Pass, funksionon në iPhone.

Microsoft ka argumentuar se rregullat e App Store të Apple-it kufizojnë aftësinë e tij për të ofruar lojëra në cloud përmes një aplikacioni të vetëm që funksionon në mënyrë origjinale në iPhone, duke i detyruar përdoruesit të aksesojnë shërbimin përmes një shfletuesi web, duke rezultuar në performancë më të ulët.

Por Apple-i ka mohuar se bllokon aplikacionet e lojërave cloud, rregullat e App Store kërkojnë që ofruesit të listojnë secilën lojë në App Store individualisht.

Ngjashëm me kufizimet në aplikacionin e ereader Kindle të Amazon, Apple-i nuk lejon që lojërat individuale të blihen nga një vitrinë brenda aplikacioneve vendase.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.