Ministria e Arsimit, Shkencës dhe Zhvillimit Teknologjik e Serbisë të premten, ka marrë vendim për mbajtjen e mësimit online për nxënësit serbë që vijojnë mësimet në Kosovë.
Në bazë të këtij vendimi, “mësimet në gjuhën serbe në shkollat fillore dhe të mesme në Kosovë do të vazhdojnë javën e ardhshme si pjesë e modelit të tretë”.
“Kjo do të thotë që studentët do të vazhdojnë të ndjekin mësimet nga distanca, pra online”, thuhet në njoftimin e Ministrisë.
Ndërsa modeli i mësimit të kombinuar do të zbatohet në territorin e 40 qeverive lokale në Serbi.
“Gjithashtu, bazuar në vendimin e Shtabit të Krizave, modeli i dytë i organizimit të punës edukative (mësim i kombinuar) do të zbatohet në klasën VII dhe VIII të shkollave fillore në territorin e 40 qeverive lokale në Serbi”.
Modeli i tretë i mësimdhënies (online) do të zbatohet kryesisht në shkollat e mesme.
Gjatë ditës së martë të 7 shtatorit, është mbajtur takimi midis drejtorëve komunal të arsimit dhe Ministres së Arsimit në Kosovë, Arbërie Nagavci.
Në takimin e përbashkët në mes të MASHT, Kolegjiumit të arsimit në kuadër të Asociacionit të Komunave të Kosovës, SABSHK dhe këshillit të prindërve u dakordua që mësimi të fillojë me 13 shtator 2021 pas rekomandimit të Institutit Kombëtar të Shëndetit Publik.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com