Haradianj: Kryeministër kërko zyrtarisht anëtarësimin në NATO

Kryetari i Aleancës për Ardhmërinë e Kosovës (AAK), Ramush Haradinaj, i ka kërkuar kryeministrit të qeverisë, Albin Kurti, që anëtarësimin në NATO ta kërkojë edhe në formë zyrtare sepse situata ka ndryshuar dhe çdo vonesë është e kushtueshme.

“Kryeministër Kurti, bëj kërkesë zyrtare për anëtarësimin e Kosovës në NATO. Mos u vono se situata është më serioze se sa mund të kujtosh!”.

“Retorikat publike për anëtarësim nuk janë të mjaftueshme. Vepro sipas procedurave e në formë institucionale”, i ka thënë Haradinaj kryeministrit Kurti me anë të një postimi në rrjetin social Facebook.

Lufta në Ukrainë ka bërë që Aleanca Veri Atlantike NATO të shqyrtoj mundësinë për futje në aleancë të vendeve të cilat nuk janë pjesë e saj.

Kosova mbetet një nga pikat kyçe të interesave ruse ën Evropë, andaj ajo edhe përmes Serbisë synon destabilizimin e Kosovës dhe rajonit për interesat e saja.

Shumë faktorë politikë në vend kanë kërkuar nga qeveria që ta kërkojnë zyrtarisht anëtarësimin e Kosovës në NATO.

Gjithashtu, kjo iniciativë është përkrahur edhe nga Kroacia, Turqia dhe politikanë në Shtete të Bashkuara të Amerikës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.