Gazetari i FAZ-it publikon disa pjesë nga intervista me ish-diplomatin Beqë Cufaj

Gazetari i “Frankfurter Allgemeine Zeitung”, Michael Martens ka publikuar në Twitter disa pjesë nga shkrimi që publikohet të shtunën me ish-ambasadorin e Kosovës në Berlin, Beqë Cufaj.

Martens vëren se ish-diplomati kritikon ashpër qeverinë e kryeministrit Albin Kurti në shkrimin nga “Frankfurter Allgemeine Sonntagszeitung”.

Ish-ambasadori Beqë Cufaj përmend fillimisht idenë e propozuar nga Berlini dhe Parisi për zgjidhjen e konfliktit ndërmjet Serbisë dhe Kosovës sipas modelit të traktatit gjermano-gjerman të vitit 1972, duke thënë se “Kosova duhet ta pranojë këtë zgjidhje”.

“Në të njëjtën kohë, Kosova duhet të lejojë komunat me shumicë serbe në Kosovë që të formojnë asociacionin e tyre me organet e tyre”.

Megjithatë, shton Cufaj, “ka dy probleme me këtë”.

“E para: Kosova ka frikë se serbët, të kontrolluar politikisht nga Beogradi, mund të kërkojnë ribashkim me Serbinë. Problemi i dytë, sipas meje, është shefi i qeverisë së Kosovës, Albin Kurti. Pas 2 vitesh në qeverisje, duket se Kurti nuk ka asnjë ndryshim nga paraardhësit e tij”.

“Nepotizmi ende mbizotëron, partia sundon në institucionet publike (…) Pas dy vitesh në qeverisje, Kurtit iu desh të hiqte dorë nga të dyja premtimet e fushatës. Një jetë më e mirë për qytetarët nuk ka ardhur dhe ai nuk mund ta pengojë Asociacionin Serb të Komunave”.

“A duhet që Perëndimi t’i kthejë shpinën Kosovës, ku ka dislokuar mijëra trupa gjatë dy dekadave për të ruajtur një paqe të brishtë, vetëm sepse Kurti refuzon të bëjë një marrëveshje me Serbinë?”, pyet Beqë Cufaj, për të propozuar një zgjidhje tjetër.

“Qeveria gjermane, si sponsori kryesor i Albin Kurtit, duhet të dëbojë populizmin nga krijimi i tij. Kosova nuk mund të lejojë të mos mbrohet nga Perëndimi”.

Në përgjithësi, mund të pyesim: Cili është mesazhi pas tekstit dhe kritikave të ashpra të ish-ambasadorit kundër qeverisë së zgjedhur të vendit që ai përfaqësonte dikur në Berlin?, pyet gazetari i FAZ-it.

Disa, shkruan ai, mund ta shohin thjesht si hakmarrje të një ambasadori të shkarkuar.

Të tjerë e përshkruajnë atë si një goditje parandaluese që nuk ka të bëjë fare me pjesën e dukshme të tekstit, vijon Martens.

Ata e shohin atë si një “tekst ajsberg”, kuptimi i të cilit fshihet kryesisht nën sipërfaqe.

Për shembull: Nëse gjyqësori i Kosovës do të ketë hetime kundër ish-ambasadorit në të ardhmen – në çfarëdo çështjeje, ndoshta duke përfshirë kohën e tij si diplomat – do të duket sikur qeveria po përpiqet të hakmerret për shkak se është kritikuar publikisht.

Në çdo rast, një kritikë e tillë e një ish-diplomati ndaj vendit të tij është e jashtëzakonshme, përmbyll gazetari gjerman.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.