Evropa kërkon më shumë astronautë me aftësi të kufizuara

Agjencia Evropiane e Hapësirës (ESA) ka deklaruar se kërkon njerëz me aftësi të kufizuara fizike, për të përcaktuar se cilat përshtatje do të ishin të nevojshme për t’i akomoduar ata në stacione hapësinore.

ESA është shprehur se është ‘dërrmuar’ nga numri rekord i aplikimeve, më shumë se 22 mijë.

Ajo shpreson që në gjeneratën tjetër të udhëtarëve të ketë më shumë gra dhe persona me aftësi të kufizuara.

Në lëshimin e rezultateve të një rekrutimi të ri që synon të shtojë larminë e astronautëve, agjencia pranoi të mërkurën e 23 qershorit se ajo ende ka punë për të bërë drejt ekuilibrit gjinor.

Vetëm 24 përqind e aplikantëve ishin gra, nga 15 përqind që kish pasur në fushatën e punësimit në 2008.

Fushata e punësimit nuk adresonte specifikisht diversitetin etnik, por theksoi rëndësinë e “përfaqësimit të të gjitha pjesëve të shoqërisë”. Agjencia mori aplikime nga të 25 shtetet anëtare dhe anëtarët e asociuar, megjithëse shumica vinin nga vendet tradicionale si Franca, Gjermania, Britania dhe Italia.

Konkurrenca është e ashpër. Vetëm katër deri në gjashtë vetë do të zgjidhen si astronautët e ardhshëm të Evropës, me një ekip rezervë prej rreth 20 personash.

Kandidatët do të shkojnë në shqyrtim intensiv gjatë vitit të ardhshëm, me një vendim përfundimtar që pritet në fund të vitit 2022.

“Ne të gjithë jemi mahnitur” nga numri i aplikantëve, tha në një konferencë shtypi Drejtori i Përgjithshëm i ESA-s, Josef Aschbacher.

Sipas tij, kjo është një shprehje shumë e fortë interesi dhe entuziazmi që njerëzit kanë në të gjithë Evropën për hapësirën. Agjencia Evropiane ka dërguar vetëm dy gra në hapësirë ​​deri më sot, Claudie Haigneré dhe Samantha Cristoforetti.

Globalisht, 65 nga më shumë se 560 njerëz që kanë eksploruar hapësirën ​​ishin gra, shumica e tyre amerikane.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.