Dolce & Gabbana synon të marrë biznesin e bukurisë në shtëpi

Tri dekada pasi marka e njohur “Dolce & Gabbana” prezantoi aromën e saj të parë në treg, drejtuesit e saj kanë ndërmarrë një plan të ri biznesi.

Një divizion i ri i “Dolce & Gabbana Beauty” do të marrë përsipër zhvillimin, prodhimin dhe shpërndarjen e produkteve të aromës dhe make-up të markës nga Shiseido.

“Ne do të jemi marka e parë italiane e modës që do të menaxhojë kategorinë e bukurisë në shtëpi”, tha shefi i ri ekzekutiv i “Dolce & Gabbana Beauty”, Gianluca Toniolo.

Megjithëse markat e modës luksoze kanë qenë pjesë e tregut të bukurisë që kur “Chanel” prezantoi aromën e saj të parë në vitin 1921, ato mbeten pas në krahasim me “L’Oréal” dhe “Unilever”.

Vetëm një pjesë e vogël e markave të modës, duke përfshirë Chanel dhe Dior, menaxhojnë prodhimin dhe shpërndarjen e produkteve të tyre të bukurisë. Shumica dërrmuese i licencojnë emrat e tyre për specialistë të palëve të treta.

Grupi japonez i kozmetikës “Shiseido”, zbuloi vitin e kaluar planet për të përfunduar marrëveshjen e licencimit me shtëpinë italiane të modës për t’u fokusuar në biznesin e saj prestigjioz të kujdesit për lëkurën.

Menaxhimi i një biznesi bukurie në shtëpi mund të jetë i kushtueshëm dhe kompleks.

“Burberry” mori për pak kohë pronësinë e biznesit të saj të bukurisë në vitin 2013, pak para largimit të CEO-s së atëhershme, Angela Ahrendts, por gjithsesi arriti një marrëveshje licencimi me Coty në vitin 2017.

Alfonso Dolce, shefi ekzekutiv i Dolce & Gabbana dhe vëllai i bashkëthemeluesit Domenico Dolce, beson se bukuria mund të jetë një biznes shumë më i madh për grupin.

Kompania parashikon se shitjet vjetore me pakicë të bukurisë do të rriten me “më shumë se 1 miliard euro” në 2.5 miliardë euro në shtatë vjet, tha ai, duke gjeneruar rreth 1.25 miliardë euro të ardhura vjetore nga shitja me shumicë.

“Dolce & Gabbana”, të ardhurat e së cilës ishin afërsisht 1 miliard euro nga 1.35 miliardë euro në vitin 2019, po investon 300 milionë euro në sipërmarrje.

Kompania e re planifikon të punësojë 150 persona deri në fund të vitit, duke ndërtuar përfundimisht një ekip global prej 350-500 personash.

“Është një treg shumë i shëndetshëm dhe shumë emocionues në të cilin po hyjnë”, tha Larissa Jensen, këshilltare e industrisë së bukurisë në grupin e kërkimit të tregut NPD.

Të gjitha kategoritë e mëdha të bukurisë u rritën në Shtetet e Bashkuara të Amerikës në vitin 2021, por asnjëra më shpejt se industria e parfumeve prej 6.3 miliardë dollarësh, e cila u rrit 35 për qind nga nivelet para pandemisë.

“Për herë të parë, kategoria e aromave tani ka të njëjtën madhësi si kujdesi i lëkurës”, tha Jensen. “Ka më shumë blerës që shpenzojnë më shumë para… Është mënyra se si konsumatorët po e trajtojnë veten”.

Ajo shtoi se për produktet më të shtrenjta – shishe më të mëdha të parfumeve, aromat artizanale dhe produktet nga markat e stilistëve – ka pasur kërkesa.

Toniolo tha se kjo e bëri Dolce & Gabbana, e cila nxjerr 95 për qind të të ardhurave të bukurisë nga aroma, të përgatitur mirë për zgjerim.

Kompania e re planifikon të prezantojë aroma “shumë të rralla, me cilësi italiane”, me lançime të reja që kushtojnë rreth 50 për qind më shumë se aromat Dolce & Gabbana aktualisht në treg.

“Duhet të shkojmë në një nivel shumë të lartë”, tha Toniolo.

Kompania gjithashtu planifikon të zgjerojë gamën e saj të kozmetikës me ngjyra dhe të hyjë në kujdesin e lëkurës, megjithëse Toniolo tha se do të shmangte produkte të tilla si antiplakje, sepse “nuk ishte një kompani teknologjike si Estée Lauder ose Shiseido”.

Marrë nga Financial Times, përshtatur për Albanian Post!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.