Bashkë apo të ndarë? – Një koment pikant nga Fisnik Syla për Fjolla Morinën

Këngëtarja, Fjolla Morina dhe partneri i saj, biznesmeni, Fisnik Syla, janë bërë fokus i mediave rozë që kur kishin publikuar lidhjen e tyre – thashethemet për një ndarje të mundshme të çiftit kanë qarkulluar për muaj të tërë.

Por, me anë të një komenti pikant nga Fisniku në postimin e Fjollës në llogarinë e saj të Instagramit, i ka hedhur poshtë të gjitha aludimet se dyshja kanë prishur marrëdhënien e tyre.

Në imazhet e publikuara, ku ylli i hitit “Trileqe” është paraqitur me një dukje pothuajse identike si të modeles, Kim Kardashian, e ku Fjolla ka shkruar se – “Qeshtu duhet me ju ndreq burrit premte t’premten”, një koment ka bërë bujë.

“Se kanë krejt ket fat o shpirt”, ka shkruar bashkëshorti i Fjollës, Fisniku, me të cilin kishin kurorëzuar dashurinë gjatë këtij viti me një ceremoni celebruese në ishujt Maldive.

Gjithsesi, pretendimet se Fjolla dhe Fisniku e kishin mbyllur kapitullin e tyre të dashurisë erdhën pasi që dyshja kishin fshirë nga mediat sociale të gjitha imazhet ku shiheshin pranë njëri-tjetrit.

Ndërkaq, Morina, po vazhdon të shijojë lirinë e saj ani pse ka kohë që kur ka hasur në probleme serioze me ligjin.

Kujtojmë se me 19 korrik të këtij viti, Policia e Kosovës e pati arrestuar, artisten, Fjolla Morina, e cila ishte në kërkim ndërkombëtar nga autoritetet e Shqipërisë, pasi mbi të rëndon akuza për trafikim të armëve dhe municion.

Lajmin për arrestimin e Morinës për Albanian Post e kishte konfirmuar zëdhënësi i Policisë së Kosovës për regjionin e Prishtinës, Baki Kelani.

“Në bazë të urdhër arrestit ndërkombëtar të lëshuar nga autoritetet e Shqipërisë, më 19.07.2017 në Prishtinë, nga njësia policore FAST-Kosova në bashkëpunim me zyrtaret policorë të stacionit policor ‘Jugu’ në Prishtinë, është arrestuar e dyshuara femër, e cila ishte në kërkim ndërkombëtar nga autoritetet shqiptare”, thuhej në raportin e publikuar për media.

Ndryshe, Fjolla Morina ishte mbajtur në arrest shtëpiak në Kukës për një muaj, por më pas ajo ishte arratisur dhe policia e kishte shpallur në kërkim ndërkombëtar.

Ajo u dënua më datë 25 mars nga Gjykata e Kukësit me 9 vite burgim, që pas zbritjes së 1/3 prej gjykimit të shkurtuar u bënë 6 vjet.

Prokuroria kishte kërkuar vetëm 7 vjet, por Gjykata u tregua më e ashpër, pasi Gjykata më herët ndryshoi edhe klasifikimin e veprës penale nga armëmbajtje pa leje në trafikim të armëve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.