A do të përfshihet sulmi kibernetik ndaj Shqipërisë në ministerialin e NATO-s?

Mbledhja e Këshillit të Atlantikut të Veriut në nivel të ministrave të Mbrojtjes do të mbahet më 13 dhe 14 tetor në selinë e NATO-s në Bruksel.

Kështu bëri të ditur shërbimi për shtyp i Aleancës.

Takimi do të drejtohet nga Sekretari i Përgjithshëm i NATO-s, Jens Stoltenberg.

Rendi i ditës së takimit ende nuk është bërë publik.

Mbetet për t’u zbuluar nëse sulmi kibernetik i Iranit ndaj Shqipërisë do të përfshihet në agjendën e këtij ministeriali.

Korrespondenti i korporatës së transmetimit publik izraelit, Amichai Stein e konfirmoi këtë lajm fill pas ndërprerjes së marrëdhënieve diplomatike mes Shqipërisë dhe Iranit.

“Shqipëria do të ngrejë çështjen e agresionit iranian ndaj saj në takimin e ardhshëm ministror të NATO-s”, shkroi Stein duke cituar një zyrtar shqiptar.

Më herët, Stoltenberg, përmes një postimi në median sociale “Twitter” bëri me dije se zhvilloi një telefonatë më kryeministrin e Shqipërisë, Edi Rama.

“NATO do të vazhdojë të ofrojë mbështetje dhe qëndron në solidaritet të plotë me Shqipërinë”, theksoi ish-kryeministri norvegjez.

NATO

Sakaq, Këshilli i Atlantikut të Veriut la të hapur mundësinë që aleanca mund të marrë në konsideratë “përgjigjen e mundshme kolektive”.

Kjo, kundër aktiviteteve keqdashëse kibernetike të Iranit ndaj Shqipërisë.

“Ne do të vazhdojmë të rrisim mbrojtjen tonë kundër aktiviteteve të tilla keqdashëse kibernetike në të ardhmen dhe të mbështesim njëri-tjetrin për të penguar, mbrojtur dhe kundërshtuar spektrin e plotë të kërcënimeve kibernetike, duke përfshirë marrjen në konsideratë të përgjigjeve të mundshme kolektive”, vërente njoftimi i NATO-s.

Mbrojtja kolektive, të cilit i referohet NATO në këtë rast, do të thotë që një sulm kundër një aleati konsiderohet si një sulm ndaj të gjithë aleatëve.

Parimi i mbrojtjes kolektive është i përfshirë në nenin 5 të Traktatit të Washington-it.

NATO thirri nenin 5 për herë të parë në historinë e saj pas sulmeve terroriste të 11 shtatorit kundër Shteteve të Bashkuara.

Aleanca ka marrë masa mbrojtëse kolektive në disa raste, duke përfshirë përgjigjen ndaj situatës në Siri dhe pushtimit rus të Ukrainës.

Shqipëria

Kryeministri i Shqipërisë, Edi Rama, deklaroi të mërkurën e 7 shtatorit se kishte urdhëruar diplomatët dhe stafin iranian të mbyllnin ambasadën dhe të largoheshin nga vendi brenda 24 orëve.

Rama tha se sulmi kibernetik i korrikut ka “kërcënuar të paralizojë shërbimet publike, të fshijë sistemet dixhitale dhe të hakojë të dhënat shtetërore, të vjedhë komunikimin elektronik të qeverisë në intranet dhe të shkaktojë kaos dhe pasiguri në vend”.

Washington-i, aleati më i afërt i Shqipërisë, fajësoi gjithashtu Iranin për sulmin dhe premtoi “të ndërmarrë veprime të mëtejshme për ta mbajtur Iranin përgjegjës për veprimet që kërcënojnë sigurinë e një aleati të SHBA-ve”.

Teherani zyrtar ka dënuar ashpër vendimin e Tiranës për të ndërprerë marrëdhëniet e saj diplomatike duke i quajtur si “pretendime të pabaza” arsyet e Shqipërisë për këtë masë.

Diplomatët iranianë dogjën gjatë orëve të para të 8 shtatorit dokumentet, orë përpara se të largoheshin nga vendi.

Zëdhënësi i Ministrisë së Jashtme iraniane, Nasser Kanaani hodhi poshtë “kategorikisht” më herët akuzat kundër Iranit në lidhje me sulmin kibernetik ndaj Shqipërisë.

“Ne hedhim poshtë kategorikisht akuzat në lidhje me një tjetër sulm kibernetik ndaj Shqipërisë dhe rezervojmë të drejtën për të ndjekur këto akuza”, theksoi zyrtari iranian.

TIMS

Mbrëmjen e 10 shtatorit sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik.

Kryeministri shqiptar Edi Rama, tha se nga të dhënat paraprake rezulton që sulmi të jetë kryer nga e njëjta dorë, pra Irani.

“Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacenueshmërinë e të dhënave dhe më pas neutralizimin e këtij akti kriminal”.

Sistemi i menaxhuar i kontrollit të kufijve, TIMS, prej vitesh po përdoret në Shqipëri.

Ai bën të mundur që asnjë person me precedentë penal, apo i dënuar nga autoritete shqiptare dhe të huaja të depërtojë në Shqipëri dhe të dalë jashtë saj.

Kjo, pasi të gjitha pasaportat përpunohen në këtë sistem që ka të integruar databazën për të gjithë shtetasit si dhe të gjitha informacionin e sistemit të Interpolit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.