Zbardhet agjenda e Ramës në “Open Balkan”

Të martën e 7 qershorit është zbardhur agjenda e samitit të nismës rajonale “Open Balkan”, e cila do të mbahet në Ohër të Maqedonisë së Veriut.

Kryeministri i Shqipërisë, Edi Rama, pritet të mbërrijë pasditen e së martës në Ohër. Më pas, krerët e delegacioneve do të zhvillojnë një darkë pune.

Tre janë shtetet e rajonit të Ballkanit Perëndimor – Shqipëri, Maqedoni e Veriut dhe Serbi – që e kanë përqafuar nismën rajonale dhe ishin të parët që morën iniciativën për të nënshkruar një sërë marrëveshjesh në samitin që u mbajt në Tiranë në fund të dhjetorit të vitit 2021.

Sakaq, të mërkurën e 8 qershorit është parashikuar dhe mbajtja e samitit mes këtyre vendeve në orën 10:00.

Seanca e parë plenare ka të bëjë me turizmin, ndiqet më pas me kulturën. Këto dy seanca do të përmbyllen në orën 12:15.

Ndërkohë 15 minuta më vonë do të zhvillohet takimi dypalësh i liderëve – kryeministri Rama, Presidenti serb Aleksandër Vuçiç dhe kryeministri maqedonas Dimitar Kovaçevski – nismëtarë të “Open Balkan”.

Një orë më pas do të nënshkruhen edhe marrëveshjet në kuadër të “Ballkanit të Hapur”.

Pas nënshkrimit, liderët do të dalin në një konferencë për shtyp.

Po ashtu, ata do të zhvillojnë dhe një vizitë në manastirin e Shën Naumit, si dhe do të eksplorojnë burimet e liqenit të Ohrit me varkë.

Rama, Kovaçevski, Vuçiç dhe ish-kryeministri i Maqedonisë së Veriut, Zoran Zaev, do t’u jepet çmimi i lidershipit rajonal për nismën e Ballkanit të Hapur.

Këtë do ta marrin nga Kryetari i Dhomës Ekonomike të Maqedonisë së Veriut, Branko Azeski, në 100-vjetorin e dhomës së tyre.

Pasditen e 8 qershorit, kryeministri Rama do të kthehet në Shqipëri.

Cilët janë të ftuar?

Kujtojmë që ftesë për t’iu bashkuar kësaj nisme kanë marrë edhe Kosova, Mali i Zi dhe Bosnjë-Hercegovina.

Këto dy të fundit do të marrin pjesë si vëzhguese në këtë samit, ndërsa Kosova nuk e ka shprehur hapur kundërshtimin edhe të këtij roli.

Kryeministri i Malit të Zi, Dritan Abazoviç, dhe Kryesuesi i Këshillit të Ministrave të Bosnjë-Hercegovinës, Zoran Tegeltrija, do të përfaqësojnë vendin e tyre.

Pjesëmarrës në këtë samit do të jetë dhe një zë lobues i “Open Balkan”, komisioneri evropian për Zgjerimin Oliver Varhelyi dhe i dërguari i posaçëm i SHBA-ve për Ballkanin Perëndimor, Gabriel Escobar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.