Ukraina do të rifillojë eksportet e energjisë elektrike

Ukraina është në gjendje të eksportojë energji elektrike për herë të parë në gjashtë muaj, pasi infrastruktura e saj energjetike po rimëkëmbet pas muajve të tërë të sulmeve të përsëritura ruse.

Rusia filloi sulmin e saj të gjatë dhe të qëllimshëm ndaj infrastrukturës energjetike të Ukrainës tetorin e kaluar.

Ajo çoi në ndërprerje të energjisë elektrike dhe ndërprerje të planifikuara, duke i lënë qytetet dhe qytezat më të vogla në errësirë gjatë dimrit.

Ukraina u detyrua të ndalonte eksportet e energjisë elektrike për shkak të situatës, por tani do të jetë në gjendje të shesë sërish fuqinë e saj të tepërt.

Ministri i Energjisë, Herman Halushchenko, nënshkroi një urdhër ekzekutiv që autorizon eksportet, megjithëse klientët vendas mbeten përparësi.

Ai tha se sistemi kishte prodhuar kapacitet shtesë për gati dy muaj dhe se ukrainasit nuk po përballeshin me kufizime.

“Dimri më i vështirë ka kaluar,” tha Halushchenko të premten. “Hapi tjetër është fillimi i eksportit të energjisë elektrike, i cili do të na lejojë të tërheqim burime financiare shtesë për rindërtimin e nevojshëm të infrastrukturës energjetike të shkatërruar dhe të dëmtuar.

Ai vlerësoi gjithashtu “punën titanike” të inxhinierëve dhe partnerëve ndërkombëtarë për të rivendosur sistemin.

Muajin e kaluar, banorët në të gjithë Ukrainën i thanë medias shtetërore britanike BBC, se furnizimet me energji elektrike po bëheshin më të besueshme.

“Qyteti është transformuar,” tha Inna Shtanko, një nënë e re në Dnipro. “Më në fund, dritat e rrugëve janë kthyer dhe nuk është më e frikshme të ecësh nëpër rrugët e qytetit”.

Megjithatë, operatori i rrjetit elektrik të vendit, Ukrenergo, ka paralajmëruar se Ukraina nuk mund të llogarisë në ndalimin e sulmeve ruse.

Ukrenergo tha të shtunën se Rusia ka lëshuar më shumë se 1 mijë 200 raketa dhe drone në objektet e saj energjetike deri më tani gjatë luftës.

Kompania e përshkroi sulmin si përpjekjen më të madhe për të shkatërruar sistemin energjetik të një vendi evropian.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.