Ten Hag: Ronaldo duhet të përballet me pasoja,

Trajneri i Manchester United, Erik ten Hag, ka thënë se “duhet të ketë pasoja” pasi konfirmoi se Cristiano Ronaldo refuzoi të hyjë si zëvendësues kundër Tottenham-it të mërkurën.

Ronaldo, 37 vjeç, u largua nga Old Trafford para përfundimit të ndeshjes, i cili u largua nga pankina dhe vazhdoi drejt tunelit në minutën e 89-të të fitores 2-0 të United.

Ai është përjashtuar për ndeshjen e së shtunës me Chelsea-n dhe po stërvitet i vetëm.

I pyetur drejtpërdrejt nëse Ronaldo refuzoi të hynte në lojë, Ten Hag tha: “Po”.

Ai shtoi se pasi portugezi bëri të njëjtën gjë në pjesën e parë të ndeshjes miqësore kundër Rayo Vallecano në parasezon, ai ndjeu se duhej të vepronte.

“Biseda është mes Cristiano-s dhe meje. Deklarata është e qartë. Është gjithashtu në deklaratë se ai mbetet një pjesë e rëndësishme e skuadrës”, tha Ten Hag.

“Unë jam menaxher, unë jam përgjegjës për kulturën këtu. Unë duhet të vendos standarde dhe vlera dhe duhet t’i kontrolloj ato. Jemi në një ekip”.

“Pas Rayo Vallecano-s, thashë se ishte e papranueshme, por nuk ishte vetëm ai. Herën e dytë duhet të ketë pasoja. Kështu ka ndodhur”.

“Neve na mungon ai nesër, kjo është një mungesë për ne dhe skuadrën, por mendoj se është e rëndësishme për qëndrimin dhe mentalitetin e grupit dhe tani duhet të fokusohemi te Chelsea – kjo është më e rëndësishmja”.

Veprimet e Ronaldo-s janë kritikuar gjerësisht, me prezantuesin e “Ndeshjes së ditës”, Gary Lineker, që i quajti ato “të papranueshme”, ndërsa ish-portieri i United, Peter Schmeichel tha se kjo ishte hera e parë që ai ishte “i zhgënjyer” nga lojtari.

Të enjten, Ronaldo tha se “nervoza  e momentit” e kishte pushtuar, megjithëse ai nuk kërkoi falje.

Ai ka shënuar vetëm një gol në tetë paraqitje në Premier League këtë sezon, dhe gjithashtu tregoi pakënaqësinë e tij që u zëvendësua në barazimin 0-0 të së dielës në shtëpi me Neëcastle.

United shkon në ndeshjen e së shtunës në Stamford Bridge vetëm një pikë pas Chelsea-t në vendin e pestë dhe Ten Hag tha se lojtarët e tij nuk do të hutoheshin nga drama e kësaj jave.

“Është pjesë e të luajturit futboll”, tha ai.

“Ka thashetheme dhe zhurmë dhe nuk mund të shpërqendroheni, duhet të qëndrojmë në punë dhe të marrim rezultatin”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.