Misioni i Britanisë në OSBE kërkon themelimin e Asociacionit

Ambasadori i Mbretërisë së Bashkuar në Organizatën për Siguri dhe Bashkëpunim në Evropë (OSBE), Neil Holland, në seancën ku u diskutua raporti gjashtëmujor i Misionit të OSBE-së në Kosovë, ka theksuar se Kosova duhet të përmbush detyrimet e saj nga Marrëveshja e Brukselit/Ohrit me theks të veçantë Asociacionin e Komunave me Shumicë Serbe.

Diplomati britanik është shprehur i shqetësuar për mungesën e progresit në dialogun ndërmjet Kosovë dhe Serbisë, mungesë kjo e cila ka implikime negative për stabilitetin në Ballkanin Perëndimor.

“Ne inkurajojmë të dyja palët që të angazhohen në mënyrë konstruktive në dialogun e lehtësuar nga BE-ja dhe të përmbushin detyrimet e tyre përkatëse, duke përfshirë themelimin e Asociacionit të Komunave me Shumicë Serbe”.

Mbretëria e Bashkuar, sipas Holland, do të vazhdojë të inkurajojë Kosovën që të sigurojë që komunitetet joshumicë të mund të luajnë një rol të plotë dhe të barabartë në të ardhmen e vendit.

“Në këtë aspekt, i bëjmë thirrje Kosovës dhe Serbisë që të vazhdojnë të punojnë me Përfaqësuesin Special të BE-së për të rënë dakord për zgjidhjet teknike për zbatimin e rregullores së re për valutat e huaja”.

Duke folur për bojkotin e serbëve në procesin e votimit për largimin e kryetarëve shqiptar nga Veriu i Kosovës, Holland, ka vlerësuar se serbët e Kosovës duhet të jenë të lirë të ushtrojnë të drejtat e tyre demokratike dhe të integrohen më tej në shoqërinë kosovare.

“Ne inkurajojmë serbët e Kosovës që të kthehen në institucione dhe t’i shërbejnë komuniteteve të tyre”.

Holland gjatë fjalimit i ka bërë thirrjes Serbisë që të kërkojë llogari nga ata që janë përgjegjës për sulmin terrorist në Banjë më 24 shtator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.