Plenkoviç kërkon llogari nga Milanoviç-i për takimin e paparalajmëruar me Dodik-un

Kryeministri i Kroacisë, Andrej Plenkoviç, ka thënë se nuk ka qenë i informuar për takimin e paparalajmëruar të së martës në mes të Presidentit kroat, Zoran Milanoviç, me Presidentin ultra-nacionalist të Republikës Srpska – entiteti serb në Bosnje e Hercegovinë – Millorad Dodik.

Kreu i ekzekutivit kroat theksoi se tani pret një iniciativë nga opozita kroate për të thirrur një seancë të jashtëzakonshme të parlamentit, ku do t’i kërkohet Zoran Milanoviç-it të japë një deklaratë të detajuar se si ishte e mundur që mysafiri i tij të vinte tek ai pa paralajmërim në mënyrën e zakonshme.

“Pres një iniciativë urgjente nga opozita për të thirrur menjëherë një seancë të jashtëzakonshme të Parlamentit kroat, për të diskutuar këtë temë dhe për të kërkuar një deklaratë nga Presidenti i Republikës se si ka mundësi që i ka ardhur një mysafir pa u njoftuar në mënyrën e zakonshme”, pohoi kreu i ekzekutivit malazez.

Këto komente ai i ka bërë pas mbledhjes së qeverisë, duke iu përgjigjur pyetjes se a e dinte që Dodik po vinte në Hvar, transmetojnë mediat kroate.

“Nuk e di. Kjo është një situatë shumë e pazakontë. Nuk kam asnjë ndikim se kë fton Presidenti i Republikës në Kroaci. Ai ka lirinë dhe të drejtën e plotë për ta bërë këtë. Kjo ka të bëjë më shumë me teknologjinë e atij udhëtimi”, potencoi Plenkoviç.

Në pyetjen nëse Ministria e Punëve të Brendshme kroate kishte informacion për të, për shkak të hyrjes në hapësirën ajrore të Kroacisë, Plenkoviç tregoi se nuk e kishte në një mënyrë që do të ishte normale.

“Nëse shteti, të gjitha shërbimet e tij, shërbimet diplomatike, policia, kontrolli i trafikut ajror, ushtria kroate, të gjithë ata që duhet ta dinë, do t’i kërkoheshin lejet e zakonshme, të gjitha do të ishin miratuar, kështu që ky lloj ardhjeje mistike duket pak e jashtëzakonshme për mua. Por, mirë, kur ke njerëz që as nuk e respektojnë festën e tyre kombëtare, atëherë mendoj se kushdo mund të vijë si mysafir i tyre, në çfarëdo mënyre dhe pa paralajmërim”.

Sipas mediave kroate, Millorad Dodik ka shkuar në takimin me Milanoviç-in në Hvar të Kroacisë me helikopter serb, ndërsa tërë këtë kryeministri kroat thotë se e ka parë në media.

“Nuk isha në dijeni se me helikopterin e kujt po vinte dhe si po vinte. Ju bëj thirrje të gjithëve, keni të drejtë, që personi që e ka thirrur Dodik-un t’i shpjegojë të gjitha ato detaje”.

Ndryshe, Presidenti kontrovers i Kroacisë, Zoran Milanoviç, ishte takuar të martën me Presidentin ultra-nacionalist të Republikës Srpska – entiteti serb në Bosnje e Hercegovinë – Millorad Dodik.

Siç njoftonte zyra e presidentit kroat, “në takimin e punës që u mbajt në Hvar, presidenti Milanoviç dhe Dodik diskutuan për situatën aktuale në Bosnje dhe Hercegovinë dhe marrëdhëniet e këtij vendi fqinj me Republikën e Kroacisë”.

“Në këtë kontekst, ata diskutuan veçanërisht nevojën për të krijuar një qeveri funksionale dhe efikase në BeH që do të sigurojë pjesëmarrjen e barabartë të përfaqësuesve legjitimë të të tre kombeve përbërëse [kroat, serb dhe boshnjak]”.

Dodik, thuhet të ketë informuar kreu e Kroacisë për bisedimet dhe proceset “që po tentojnë të zgjidhin krizën institucionale dhe politike në BeH, ku u pajtuan se është e nevojshme si për mirëqenien e të tre popujve në BeH, ashtu edhe për përshpejtimin e integrimit evropian të BeH-së”.

Republika e Kroacisë, potencohej në komunikatë, “mbështet dhe mirëpret të gjitha marrëveshjet e përfaqësuesve legjitimë politikë të tre kombeve në Bosnje dhe Hercegovinë, të cilat sigurojnë barazinë e tyre, stabilitetin e Bosnje e Hercegovinës dhe rrugën e saj evropiane”.

Ky takim i Milanoviç-it me presidentin autoritar të RS-së vjen në një kohë kur në Bosnje e Hercegovinë ka një krizë politike.

Kjo krizë është shkaktuar pikërisht nga Dodik, me veprimet e tij de-stabilizuese dhe anti-Dejton (marrëveshja që i dha fund luftës në BeH, më 1995).

Madje, edhe e gjithë bashkësia e organizuar ndërkombëtare ka kundërshtuar këto veprime të tij, duke paralajmëruar edhe masa ndëshkuese ndaj tij.

Kujtojmë se Dodik është në listën e zezë të Shteteve të Bashkuara të Amerikës dhe në atë të Mbretërisë së Bashkuar.

Nga ana tjetër, presidenti i Kroacisë, Zoran Milanoviç, njihet për qëndrimet e tij kontroverse.

Ai shpesh kundërshton publikisht organizmin ku shteti që ai udhëheqë bënë pjesë, Bashkimin Evropian.

Qëndrim për tu habitur kishte mbajtur edhe për agresionin e Federatës Ruse ndaj Ukrainës, madje kur e gjithë bota perëndimore po i ndihmonte Kievit, Milanoviç kishte refuzuar që ushtarët ukrainas të stërviteshin nga Kroacia.

Milanoviç takohet me Dodik-un, diskutojnë për situatën aktuale në BeH

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.